LIWAT na naman nga napukaw ang interes sang publiko sa sugilanon kon paano matapna ang pagluntad sang insidente nga ang may kahimuan amo ang riding in tandem.
Madugay na ini nga palaligban kon paano tapnaon ilabi na nga tubtub sa karon wala pa sang suspek nga may nakasuhan ukon natumod man lang nga amo ang taghimo sang krimen.
Maathag nga wala sang klaro ukon buron tubtub sa karon ang ginahimo nga imbestigasyon sang aton kapulisan bangud sila mismo ang wala sang salandigan ukon wala sang dugang nga impormasyon agud nga mapadayon ang imbestigasyon.
Pila na ka insidente ang natabu kag ang tanan nga mga himata sang mga biktima ang nagatugyan na lang sa makaaku nga ila maagom ang maiwat nga hustisya.
Madamo naman nga City Director sang Iloilo City Police Office ang nagbulos-bulos sa pwesto apang ang nauna na nga nagbiya ang nahaw-asan na sang katungdanan bangud nga ang nagaabaga amo karon ang yara sa pwesto. Sila ang nagasabat sa hitabu nga wala natabu samtang sila ang nagapungko. Pareho ang sabat nga mabatian nga ang kaso padayon nga gina-imbestigaran.
Masakit matuod para sa mga biktima nga daw kaangay lang sang manok nga ginpanghunos sa kurungan kag ginsentensyahan sa higad sang dalan ukon ginalipdan lang sa kahilamunan sa tunga sang madulom nga gab-i nga ang naga-iwag amo ang dalok nga kasanag sang bitoon kag ang huni sang sirom-sirom nga ginapadulog sang kanta sang armas-luthang.
Ang iban nga biktima ang halos nadunot na sa ila lulubngan apang ang pamangkot kon sin-o sa ang nagluthang sa ila, sa gihapon wala pa sang kasayuran.
Paano makilala ang mga suspek nga nagapanago ang ila guya sa likod sang madulom nga helmet kag kadungan ang pagsuksok sang iban pa nga tabon agud nga indi gid sila makilala. Kalabanan sa ila ang wala nagagamit sang plaka ukon ang nakasulat ‘for registration’.
Madugay na nga ginaproblemahan sang kapulisan kon paano matapna ang pagluntad sang mga insidente nga ang may kahimuan amo ang riding in-tandem.
May mga proposal nga ginaduso kaangay sa pagpadaku sang plate number agud nga makita gilayon kag maathag nga mabasahan sang mga tawo nga yara sa palibot. Apang ang mga kriminal kahibalo maglikaw sa sini nga patakaran.
Tubtub karon walapa napatuman ang ini nga kasuguan nga nagasaad sa kon ano ka daku ang dapat nga mangin plaka sang motorsiklo kag dapat napagkit sa atubang kag sa likod sang motorsiklo.
Tuyo naman karon nga dumilian ang pagmaneho sang motorsiklo nga may angkas ukon dapat babaye lang ang angkas. Apang, ang ini nga plano ang indi makapugong sa mga tawo nga may yara sang daku nga handom nga pukanon ang ila kasumpong.
Sadto pa, ginapanawagan na naton nga indi pag-ipatuman ang pagsuksok sang helmet kon yara sa syudad sang Iloilo nagataris ang motorsiklo. Dapat wala sang tabon ang guya agud madali mamulalungan ang sin-o man nga nagasakay sa motorsiklo.
Mas madamo ang napatay bangud sa tiro sang riding in-tandem kaysa sa naaksidente sa dalan bangud wala sang helmet.
Dapat nga timbangon naton ang sitwasyon kon diin ang mas nagakadapat ukon nagakaangay nga sundon ukon tumanon. Indi man makapadalagan gid sing madasig ang nagamaneho sang motorsiklo sa syudad sang Iloilo bangud sa guot nga trapiko kag madamo sang bangga nga dalan. Indi makahabyog sa kadasigon bangud madamo sang intersection.
Nakita naton, kaangay man sa iban nga syudad, nga ila ginapahukas ang helmet sang mga motorista kon yara sila sa sulod sang syudad agud nga mas makita ang iya guya. Mahapos sila matumod. Ini ang pamaagi agud nga matapna sila sa paghimo sang krimen. Matagam sila bangud makita ang iya guya.
Dapat mangin praktikal ang aton solusyon sa sini nga palaligban. Ang problema naton kon paano matumod ang mga suspek. Ang solusyon amo nga indi dapat matabunan ang guya sang mga nagadala kag nagasakay sa motorsiklo.
Madamo sang nagahimo sang patakaran ukon nagapadikta sa paghimo sang polisiya nga ang nagakumpas mga negosyante agud nga may lugar sila ukon higayon nga makaganar sa mga produkto nga ila ginabaligya.
Nagapati sila nga kon ligwaton ang patakaran pabor sa ila produkto, mas makaganar sang daku ang ila negosyo.
Kon ang solusyon agud mapunggan ang pagluntad sang krimen amo ang ‘police visibility’ ukon makita ang pulis nga yara sa dalan, posible nga solusyon man ang ‘face visibility’ sang mga motorista agud nga madalukan sila sang higayon nga maghimo sang krimen.(bertladera@gmail.com/PN)
