MADAMO nga kabuhi kag pangabuhian ang ginhalitan sang Covid, indi lang diri sa aton pungsod kundi sa bug-os gid nga kalibutan.
Nagpamuklat man ini, ugaling, sa aton sang madamo nga bagay nga nalipatan naton, nga ang iban sini mas importante pa gani sa kabuhi kag pagpangabuhi naton nga mga tawo.
Una na dira ang ka-importante sang aton kalagnon nga kabuhi. Tungod sa Covid madamo ang nagbalik-loob sa Diyos, nangin mas matutum sa ila pagtuo, kag mas madumdumon sa kinahanglanon sang mga kubos sa aton.
Nangin mas makahulugan man ang pagbulig sa mga pumuluyo sang kontra partido nga gobyerno kag nalimtan sang madamo sa ila ang pulitika.
Wala man nagpabaya ang mga kauturan naton nga mas may ikasarang sa pangabuhi kag ang may oportunidad nga makabulig sang ila kabudlay.
Ang health protocols, nga gapatuman sang social distancing kag paggamit sang face mask bisan sa eskwelahan, naghatag man sing oportunidad agud mas epektibo pa gid ang pagtudlo sa mga kabataan. Kon sadto nagaginutok ang mga kabataan sa klasehan, karon limitado lang sila sa bagay nga kadamuon para sa mas mabungahon nga pagtudlo sa ila.
Ang ginapatuman subong sugod sang pagbukas sang klase sadtong Agosto 22 amo ang “blended learning”, kon diin ang isa ka paagi dira amo ang pagsulod sa klasehan sang isa ka grupo sang mga estudyante sing “face-to-face” samtang naga-“distancing learning” ang iban nga sa masunod nga tion sila naman ang ma-F2F, and so on.
Sa isa ka klasehan nga nahibal-an naton, por ejemplo, mga 30 lang ang ginbaton sa F2F nga klase, kag ang nabilin sa 50 sa ila ma-“distancing learning” lang sa ila puluy-an, kag ugaling magbulos naman sa F2F nga klase sa amo man nga hulot.
Sa isa ka klasehan nga nahibal-an ko man sadto sa Lapaz NHS, mga 70 gid ang mga estudyante. Pwede ini sila magbulos-bulos sa F2F kag “distancing learning” nga tag-35 ang kada grupo sa idalom sang “blended learning”.
Sunu sa isa ka research sa United States, okey man ang kadamuon sang mga estudyante nga indi lang magsobra sa 40 sa isa ka klasehan.
Tungod indi man tuman ka damo ang mga estudyante, mapahapos kag mas epektibo gid man matuod ang pagtudlo sang manunudlo. Kag bisan “heterogeneous” pa ang klase, ukon mixla sang gakalain-lain nga mental ability. “Homogeneous” ang tawag sa klase nga halos kasubong ang ila group mental ability.
***
Gina-pangibulahan naton si anay Bise Presidente Leni Robredo sa pagkapili sa iya sadtong Agosto 31 (oras sa US) sang Kennedy School’s Center for Public Leadership (CPL) sang Harvard University bilang isa sang mga Hauser Leaders para sa Fall 2022 Semester.
Kaupod niya diri sanday US Representative Jane Harman, novelist kag columnist David Ignatius, Michael Lomax nga president kag CEO sang United Negro College Fund UNCF), kag Doy Seidman nga founder kag chairman sang LRN kag The HOW Institute for Society.
Ang mapilian bilang Houser Leader sang Harvard’s CPL amo yadtong mga tawo nga kilala bilang “living examples of principled and effective public leadership”.
Ang pagkilala sa sining kapinasahe ni Robredo,siling sang CPL, bunga sang iya liderato bilang Bise Presidente sadto nga nagpatuman sing “standard of swift, efficient response…” sa pagbulig sa mga apektado nga mga komunidad indi lang sa tion sang kalamidad kundi sa padayon man nga rehabilitasyon sang ila kahimtangan.
Gin-mensyonar man sang Center ang paglansar ni Robredo sang Angat Buhay Program sang Bise Presidente pa siya nga nakatutok sa pagbulig sa “the poorest, farthest, and smallest parts around the country”, nga wala mahimo sang iya mga kasumpong sa kampanya tungod ini nga mga lugar indi makahatag sa ila sang “winning votes”.
Tungod sa sining kabalaka sa mga “poorest of the poor”, si Robredo gid ang may madamo nga lugar nga nalab-ut sa kampanya ikumparar sa iya mga kasumpong kay bisan ang may mahatag lang sing diutay nga boto ginkadtuan pa niya.
Daw ginasiling ni Robredo sadto nga “Indi bale mapierde ako indi lang mahambal nga ginpabayaan ko ang labing kubos sa aton mga pumuluyo.”
Ining Angat Buhay Program ni Robredo sadto may bulig sang private sector tungod ang kontra-partido nga gobyerno indi makabulig sing lubos sa iya upisina.
Ginadumalahan, sa karon, ining programa ni Robredo sang NGO nga Angat Pinas Inc. nga gintukod niya sadtong Hulyo 2022 pagkatapos gid sang iya termino.
Congratulations, Leni!/PN
