Sa ano nga edad masarangan pa ni lolo kag ni lola magpahalipay sa partner?

INDI dapat katingalahan ang pag-upod sang isa ka lalake kag isa ka babaye sa pangabuhi nga may kapinasahe nga pagkatuhay ang ila sitwasyon.

Ina tungod sa madamo na nga kasubong nga mga kaso nga nagakatabo sa aton palibut, nga indi na naton dapat libakon kag iyumo-yumo lang kag kaluy-an pa gani ang iban.

Samtang ang iban ginakuhaan pa naton sang modelo sing maayo nga pag-upod nga indi mahimo sang kadam-an sa aton.

Lakip diri ang pagkakas ni King Edward VIII sang Britanya  sang iya korona agud pakaslan ang diborsyada nga Amerikana tungod sa indi matakos nga gugma.

Apang indi lang si King Edward VIII ang nag-give up sang iya corona sa ngalan sang gugma. Ang chief sang Bamangwato (Botswana, sa karon) napilitan man sa pagtalikud sa iya katungdanan sang ginpakaslan niya ang isa ka British woman, si Ruth Williams sadtong 1948. Sa ina nga panahon sa ila lugar taboo ang bisan makita lang ang isa ka puti nga babaye nga kaupod ang isa ka black man.

Indi man seguro dapat pakalainon sang manggaranon nga pamilya nga ang ila pamatan-on magtanyag sing pagpangasawa sa isa ka matahum nga lin-ay halin sa kubos nga pamilya. 

In fact, as always, ang matahum nga bagay “is a joy forever”. Sa panahon gani sang Medieval Chivalry ginakuhaan sing inspirasyon sang mga knight sa ila horseback tournament ang nagatalambong nga matahum nga mga lin-ay.

Katulad ini sila, sa subong, sang mga “muse” nga ang presensya nagahatag inspirasyon sa athletic teams sa ila  pagparada kag pagtambong sa paindis-indis. Labi na gid kon kandidata ini nga nagdaug sa isa ka international beauty pageant.

Take it halin sa pagpangasawa sang milyonaryo nga Filipino nga si Virgilio Hilario kay Armi Kuusela, nga ordinaryo lang nga lin-ay sang Finland sang wala pa magdaug, nga sa iya pagdaug bilang una nga Miss Universe naghatag daku nga dungog sa ila mga pungsod.

***

Partikular naman sa kaso sang daku nga agwat sang ila edad, indi man gani ini problema gid.

Kon may problema gid man seguro, ina ang angot sa sex life sa tunga sang linghod kag gahingurusgan nga asawa kag iya bana nga basi nangin mahina na ang pagka-barako. Pero, sa experyensya sang kasubong nga pag-upod, indi man gani matuod ini. Pangkuta bala si lolo?

Nagahina matuod ang gana sa sex sang tawo, babaye man ukon lalake, samtang nagatigulang na. Apang indi man pareho ang naturalisa sang babaye kag sang lalake sa ina nga bagay. Bataon man si asawahon kag mahina na ang paningkay-singkay ni lalake, matumbasan gihapon ini sa “compensating differences” nila.

Ina tungod ina, sunu sa mga experto, kay padayon ga-producir sang semilya si lalake “until the day he lives” nga nagabulig sa padayon nga pagbaskug sang iya pagkalalake nga, sa masami, tubtub sa edad 70 anyos basta maamligan lang niya ang iya ikaayong lawas. Sa isa ka survey gani sang mga may edad-edad na sadtong 2021 sa US, 35% gid ang nagsiling nga mas nangin mahuyog pa sila karon sa sex sangsa linghod pa sila.  

On the other hand, sa bahin sang babaye, mauntat na ang pag-producir sini sang itlog sang kabuhi sa paglab-ut sang iya menopausal period nga, sa masami, gaabot sa edad nga 40-50 anyos.

Sa tion sang iya menopausal period, amat-amat na galikaw si asawahon sa sex kay sa ina nga panahon “mala” na siya kag masakit na sa iya ang magbaton sang pagsulod ni banahon. Indi naman siya makabata. Ugaling basi indi ini ma-intiendihan ni banahon kag magloko sa iban.

Well, may medyos man si asawahon agud mapasugtan ang palangga nga bana. May mga padanlog man nga mabakal sa botika.

Kon si asawahon magana gihapon kag paloypaloy na si banahon, may mga bulong man para mapaakig si manoy.

Of course, may exception man sa kalabanan nga nanghina na. Ang bantog nga comedian nga si Charlie Chaplin nakapangasawa sang 18 anyos nga dalaga. Si Ooana O’neil, kon diin nakahimo pa sila sing 8 ka kabataan bag-o siya nagtaliwan sa edad nga 87 anyos.

Ang ginsiling nga “oldest dad” nga Indiano gin-report nga sa edad nga 96 nakapabata pa siya kag luyag pa sundan ini.

Sa bahin ni lola sa isa ka lugar sa Filipinas, ginbalita nga nagbusong ini sa edad nga 63 anyos upod ang iya 25 anyos nga bana./PN