NAGAPALUPAD sang sugilanon ang administrasyon ni Gov. Arthur Defensor Sr., ginapalapta ang kahangawa kon indi mapasar sang Sangguniang Panlalawigan ang P3.7 billion nga badyet para sa tuig 2019 antes ang Disyembre 30, 2018.
Kon indi mapasar ang 2019 nga badyet, gamiton sang kapitolyo ang badyet kaangay sa napondohan sa tuig 2018 ukon reenacted budget kag ang mga bag-o nga programa kag proyekto nga ginaduso para sa 2019 ang indi mapondohan.
Ginapalapta nila ang ila kahangawa paagi sa pagsiling nga magutman ang mga empleyado kag mabutang sa peligro ang 4th tranche sang saka sa sweldo sang mga regular employees nga ginamandu sang Salary Standardization Law kag indi magamit ang 20 percent development fund sa idalom sang reenacted budget.
Ginakibang ang gobernador sa landong sang iya nagliligad kon sa diin sadtong iya bata nga si Cong. Toto Defensor Jr. ang chairman sang appropriations committee sang siya pa ang Provincial Board member, ila man ginhimo ang nasambit nga bagay kon sa diin sadtong 2008 kag 2010 nag-operate man ang kapitolyo sa reenacted budget sa idalom ni anay Gov. Niel Tupas Sr.
Nagatiyangak kag nagapakitluoy ang gobernador nga aprubahan ang iya ginaduso nga badyet apang antes kaunon ang pandesal dapat lantawon ang iya palaman basi may nakasal-ot nga makatalagam kag mapilas ang tutunlan.
Athagon naton nga ang Salary Standardization Law (SSL) isa ka national law kag mapasar man sang local government ukon indi ang badyet para sa masunod nga tuig, ang saka sa sweldo ang madayon kag maga-epekto.
Nasaad sa Executive Order 301, series of 2016, ilabi na sa Section 11, nga ang 4th tranche sang saka sa sweldo sa idalom sang SSL ang maga-epekto sa Enero 1, 2019.
Engkaso nga sa Marso 2019 pa mapasar sang Sangguniang Panlalawigan ang bag-o nga badyet, ang ila sweldo ang may retroactive effect sa Enero tubtub Pebrero 2019.
Indi matuod nga kon indi mapasar ang 2019 annual appropriations sang probinsya malugaw-an na ang mga empleyado sa kapitolyo. Nagapanganduhoy lamang ang gobernador kag ginabangil ang interes sang empleyado agud nga magreklamo kontra sa mga board member.
Kuntani pasangkaron man sang tanan ang ila paminsaron, tungkaron ang matuod nga impormasyon agud nga indi maulamid sa makaduluda kag makasalangisag nga pahayag.
Wala sang may magutman nga empleyado sa kapitolyo, may yara lang sang pulitiko nga mapaslawan sa iya plano.
Indi angay nga gamiton sa pag-ingganyo sa pulitika kag pangpaganyat sa simpatiya ang istorya tuhoy sa sulok-sulok sang isa ka tawo bangud nagakadula ang ila husto nga panimuot kon ang ila sulok-sulok nagaraguok.
Obligasyon sang mga maalam kag sang mga masaligan nga ipaathag ang matuod nga kahimtangan sa saka sang sweldo. Ipahibalo nga wala sang may makapugong diri bangud nga nasaad na ini sa kasuguan kag obligasyon sang lokal nga pamunuan nga pondohan, kag bisan reenacted ang badyet apang may mahimo sa gihapon sila nga paagi kaangay sa paghimo nila sang paagi sa mga bagay nga ila luyag kag makahatag sa ila sang benepisyo.
Ginapanugyan sa mga empleyado nga dapat ninyo ini nga hangpon kag indi gid magpalimbong. (bertladera@gmail.com/PN)
