SANG sini lang (Nobyembre 9, 2018, sunu sa balita), ang Sandiganbayan nagpagwa sang iya desisyon nga naga-convict, ukon nagahusgar sing guilty, kay anay First Lady Imelda Marcos sa pitu ka kaso sang graft and corruption.
Ining mga akusasyon naga-involver sang paggamit niya kag sang iya bana, ang anay nagtaliwan na nga diktador nga si Ferdinand Marcos, sang ila mga foundations sa Switzerland sa negosyo, sa balor nga mga $200, nga gina-prohibir sang Konstitusyon. Beneficiario man sining ila negosyo ang ila kabataan nga sanday Imee, Irene kag Bong-Bong.
Ang ining akusasyon ginpasaka sang Presidential Commission on Good Government (PCGG) sadtong 1991 sa Ombudsman, nga nag-aprobar kag nagpasaka man sini sa Sandiganbayan.
Ang Sandiganbayan (People’s Advocate) isa ka special appellate collegial court nga may hurisdiksyon sa mga kaso kriminal kag civil nga naga-involver sang graft and corrupt practices, kag kasubong nga mga kaso nga ma-komiter sang mga opisyal kag empleyado sang gobyerno, lakip ang mga government-owned ukon government-controlled corporations (GOGCC).
Sa sini nga desisyon sang Sandiganbayan, ang 89 anyos ang anay First Lady ginpatawan sang pagkabilanggo sa sulod sang anom ka tuig kag isa ka bulan sa minimum tubtub sa 11 ka tuig sa maximum sa kada isa sang pitu ka akusasyon kontra sa iya.
Sa kabug-usan, ang ining pagkabilanggo ni Imelda magalab-ut sa kabilugan nga 40 anyos sa minimum ukon 70 anyos sa maximum.
Ang Sandiganbayan nagapreparar sa karon sa pagpagwa sang warrant of arrest kay Imelda. Pwede man siya, ugaling, makapasaka sang iya kaso sa Korte Suprema, sunu mismo sa PCGG nga nagalaum nga indi na ini siya makaluas pa bisan sa Korte Suprema.
Samtang, nagpahayag man ang Palasyo nga kon mangin-final na gid man ang desisyon sang Korte Suprema basi mahulugan si Imelda sang pardon ni Presidente Duterte – tungod seguro kay kaalyado niya ini sa pulitika kag tungod man sa iya edad kag kahimtangan sang ikaayong lawas.
***
Ginkalipay ining pag-convict kay Imelda sang mga biktima sang martial law ni Marcos, kag sang madamo pa nga mga pumuluyo nga indi makauyon sang diniktador nga pagginahum kag sang kalainan nga dala sini. May naghinugyaw pa gani.
Ang matuod, in the long run, ang mga yara man lang sa poder ang maka-benepisyo sa martial law, indi bala? Saksi dira mismo ang martial law ni Marcos.
Sa akon bahin, wala ugaling ako nalipay sa sining pag-convict kay Imelda tungod sa kadugay nga pagkinasuhay.
Paano ka abe malipay kay, samtang ang mandato sa aton korte amo ang “speedy trial”, ang kaso ni Imelda naglab-ut sang halos tatlo ka dekada (30 anyos) bag-o na-desisyunan.
“Speedy trial” bala ina ang 30 anyos? Daw palumba ini sang koneho kag bao sa diin nagdaug pa ang lumpayod nga bao. Daw nagpabaya ang koneho, kag nagtulog pa anay, agud tagaan sing pribelihiyo ang bao nga magdaug sa palumba.
Fuera los buenos sa husgado, pero ngaa ayhan nagdugay ang kaso sang amo sina ka dugay? Kamo na lang seguro maghangop-hangop da, kay basi mag-malisyoso pa ako.
Isa pa, indi ta pa masiling nga mahunong gid sa bilangguan si Imelda. Man, maka-piyansya pa man siya. Pwede man siya seguro maka-Petition for Reconsideration kag, kon mapaslawan siya, pwede pa niya ipasaka ang iya kaso sa Korte Suprema.
Gaduha-duha ugaling ang iban kon yara na ini sa Korte Suprema. Man, ang subong nga Korte Suprema amo man ang naghatag sing kadungganan sa nagtaliwan nga diktador agud ilubong sa Libingan ng mga Bayani, sa diin wala man gani malubong dira ang iban, katulad ni Gat Jose Rizal kag Gat Andres Bonifacio, nga bagay gid malubong dira.
Well, kon wala kita nalipay sa sining sitwasyon, at least gapasalamat kita sa kaisug sang Ombudsman kag Sandiganbayan, bisan ulihi na, nga nagtindug sing may kaisug agud tagaan sing kahulugan ang nagakabagay nga hustisya sa sini nga kaso ni Imelda.
Dalayawon matuod ang kaisug sang Ombudsman kag Sandiganbayan! Tani pabor man ang Korte Suprema sa sining desisyon sang Sandiganbayan. (w_mateojr@yahoo.com/PN)
