SA ISA ka sibilisado nga sosyodad, may ginapatuman nga mga pagsulondan kag kasuguan. Ini ang nagaubay sa mga pumuluyo agud magkabuhi sang malinong, matawhay, may paghiliusa, pagtahod kag kasiguraduhan sang kaugalingon.
Apang ngaa may nagakatabo nga krimen? Ngaa magarot ang isa ka komunidad?
Ina bangud may mga nagalapas sang kasuguan.
Ngaa bala nga ang pagtuman sang pagsulondan daw isa ka silot ang atun pagkabig?
Kun ginapatuman gani ang kasuguan, nagarebelde kita kay pamatyagan sang iban, isa ini ka sahi sang pagpamigos.
Matuod may mga kasuguan kita nga mapintas kun ipatuman. Pero madamo man sang kasuguan nga makapatawhay sang atun kabuhi kun atun sundon.
Sining panahon sang pandemya, ginlimitahan ang atun hulag. Natilawan ang atun pasensya sa pagpabilin sa balay kag pagtuman sang mga health protocols. Diri nakita kun ano kasinupakon ang madamo sa atun.
Diri sa syudad sang Iloilo may mga ordinansa nga ginapatuman sa husto nga pagsoksok sang face shield kag facemask kag physical distancing. Bangud sini madamo ang nadakpan, namultahan kag may nagpili sang community service bilang penalidad.
Sang nagligad nga semana nabutang sa sentro sang kontrobersiya ang mga lokal nga opisyal sang syudad sa pagpamuno ni Mayor Jerry Treñas. Ini matapos nakita ang kakulang sang pagtuman sang health protocols sa pagpanagtag sang financial assistance sa Iloilo City Freedom Grandstand.
Ang masakit pa kay gin-gamit nga palaagyan sang pagpakilala sang mga kandidato sang iya grupo ang tion. Nagpahayag sang ila tagsa ka bahin ang mga natungdan kag nagpalambot sang ila pagpangayo sang pasaylo. Ila man gin ako ang kapaltahan.
Mabudlay gid magtuman sang pagsulondan bangud naanad kita sa hilway nga paghulag. Kun kaisa indi man ini intention kundo posible nagakalipat lang kita ukon base may ara gidman nga salawayon ukon sa pulong sang mga tigulang “Dungol”./PN
