UMPISA na subong nga adlaw ang pag-file sang certificates of candidacy sang mga luyag magpapili sa tagsa ka pwesto nga ila ginahandom sa ila lugar nga nasakupan.
Maga-umpisa sila sa pagpanawag sa ngalan sang Diyos nga gamhanan. Magapangayo sang bulig nga sila ang buylugan kag bendisyunan sa ila mga desisyon sa kabuhi.
Magatumpok ang ila tagsakdag gikan sa paghiwat sang balaan nga misa tubtub nga matapos ang misa kag magplastar sa pagpalapit sa baba sang pwertahan sang simbahan. Ila nga ulong-ulungon kon mahimo na sila makasugod sa pagpanglakaton padulong sa opisina sang Commission on Elections.
Lunsay naka-uniporme ang mga tagsakdag, kalabanan sa ila may isa lang ka duag, nagabitbit sang pahabok ukon wagayway, may mga nakasulat sang ngalan sang mga kandidato, may mga nawong sang pulitiko, may lista sang linyada sang ila grupo kag ginahakyaw agud nga makita sang mga tawo.
Magalakat sila sang mahinay nga daw kaangay nga nagahulat nga may magalantaw sa ila, sige ang pagkaway sang mga kamot sa kutob ila makita nga mga tawo sa kilid sang dalan, maagasinggitan sang ngalan sang mga kandidato ang ila mga tagsakdag, kag magapanghatag sang mga magagmay nga papel nga may ngalan sang mga kandidato.
Malawig ang pila sang ila pangpanglakaton sa karsada. May malipay sa ila aktibidad kag may yara man sang magakumod bangud sa huol sa trapiko nga ila matuga, ilabi na sa mga ruta nga ang mga pasahero magapadulong pa sa mga eskwelahan kag mga opisina.
Padayon ang ila pagprusisyon sa dalan tubtub nga makaabot sa opisina sang Comelec, didto sila liwat nga magatumpok, liwat nga magatipon, kag liwat nga magasinggitan sang ngalan sang ila kandidato kag liwat nga magahakyaw sang mga dala nila nga plakard.
Bisan sa diin man nga bahin sang pamusod sang pungsod, kaangay sini ang imo makita sa sulod sang tinion nga gintagna sang Comelec nga pag-file sang tagsa ka kandidatura sang mga magapapili.
May maga-umpisa sa una nga adlaw, may yara naman nga magapaulihi sa mismo ulihi nga adlaw. May yara man sang nagalantaw sa bwenas nga numero kag nagakonsulta kon ano ang swerte nga adlaw para sa ila sa pag-file sang ila kandidatura.
Madamo sang lihi, madamo sang panimad-on, madamo sang ginapatihan nga posible maka-impluwensya sa ila kadalag-an.
Apang ini tanan lunsay mga pampaganyat lamang sa mga botante, paghaylo sa ila agud nga mag-upod sa kandidatura sang nagalabay nga pulitiko. Ginapakita diri ang ila kusog, ang ila pwersa kag ginapabatyag sa kasumpong nga indi sila mahaku-haku nga malutos.
Yara sa gihapon sa mga botante ang pag-usisa sa tagsa ka kandidato kon ano ang ila integridad, kon ano ang ila tinutuyo kag kon ano ang ila mabulig sa pagpatin-ad sang pangabuhi kag pagsampig sa kawsa sang mga kubos.
Mahapos ang magpasalig apang mabudlay ang magtuman sa mga nabungat sa tion sang kampanya. Ang tanan nagaligwat sa iya panan-awan depende sa kon diin ang iya nahamtangan.
Kuntani ang mga botante indi magpadala, indi malingaw, indi mag-nganga sa ila ginalantaw nga sarswela sa karsada. (bertladera@gmail.com/PN)
