TUBTUB karon padayon ang pagpamatok sang mga estudyante nga magabutho sa College of Law sa West Visayas State University.
Ginarigkaman sila nga mangin manunudlo si First Lady Liza Marcos. Ginaluad sang ila paminsaron kag balatyagon. Indi nila luyag nga makabaton sang ideya gikan sa sini nga manunudlo.
Apang, sang san-o pa makapili sang manunudlo ang mga estudyante? Sa akon pagkahibalo bilang nangin estudyante sang sini nga buluthuan nga mismo ang unibersidad ang nagadesignar sa magatudlo sa partikular nga subject. Ang mga estudyante nagalantaw lang sang iskedyul kag ginatsekyar kon sin-o ang magatudlo. May higayon sadto nga wala pa sang available nga magatudlo sa isa ka subject rason nga wala ang pangalan sang propesor.
Kon wala sadto naluyag ang estudyante sa iya propesor, nagasaylo siya sang iskedyul ukon gina-drop niya ang subject agud ng indi magsumalang ang banas nila sang iya ginalikawan ng manunudlo. Ang iban nagasaylo sa iban nga buluthuan kon ginalantaw niya nga mabudlayan siya sa iya nga pagtuon.
Madamo sang opsyon nga pwede himuon ang isa ka estudyante kon wala sia nanamian sa magatudlo sa sina nga buluthuan.
Ginapangabay lang naton nga indi nila paghalitan ukon higkuan ang proseso bangud lang sa ila kaugalingon nga kapritso.
Kon indi sila, saylo sila sa iban ng buluthuan. Madamo sang mg estudyante nga nagahulat nga magabulos sa ila sa listahan sang mangin estudyante agud nga makatuon kag masanagan tuhoy sa aton mga kasuguan.
Nagapabor ako nga dira magtudlo si Atty. Liza Marcos tungod nga kwalipikado sia kag bugal sang buluthuan nga nagapaambit sang iya kaalam ang First Lady sang pungsod. Bugal man ini sang mga estudyante kag maragtason para sa ila nga ang nagatudlo isa ka First Lady sang pungsod.
Bentaha man ini sa WVSU tungod nga basi makabalikid man si Atty. Marcos sa kon ano ang iya mahatag nga bulig sa buluthuan para sa benepisyo sang kadamuan – sa mga estudyanye, sa mga manundulo, kag sa buluthuan mismo.
Indi mahinago nga daku ang nangin papel sang mga Marcos sa pagtin-ad sang buluthuan. Sadtong Enero 27, 1986, ginpirmahan ni Presidente Ferdinand E. Marcos, Sr. ang Presidential Decree No. 2019 nga naghimo sa West Visayas State College (WVSC) nga mangin West Visayas State University, nga ginalakip ang Iloilo National College of Agriculture (INCA) sa iya sistema.
Naglipas na ang panahon, dapat nga mag-abante na kita. Indi angay nga magsige ka ukay sa pilas sang nakalipas. Papalion na naton ang pilas paagi sa gahum sang panahon.
Indi angay nga magmaranhig kag angan-angan magbangon sa isyu nga madugay na nga nalubong. Hatagan naton sang higayon ang kada isa kag hakson naton ang kaayo nga madugay na naton nga gindingot sa tagsa-tagsa.
Ulikdan naton ang buluthuan, ang iya kaayuhan nga mangin kaayuhan man sang nagasunod nga henerasyon.
Indi naton masikway ang martial law bangud nalakip ina sa konstitusyon bilang proteksyon sang pungsod batok sa nagatuyo nga magpukan sa iya.
Angay gid man kamo nga magtuon sang kasuguan bangud subong pa lang nagapakita na kamo nga kinahanglan ninyo nga mahangpan katuyuan sang martial law kag kon ngaa yara ini sa konstitusyon.
Kalaw-ay lang lantawon ang kahayag sang inyo kulang sa pagpanalawsaw tuhoy sa inyo ginasinggitan.
Kabay nga magiyahan kamo sing lubos agud nga indi na kamo magtalang pa sa banas nga inyo gina-usoy.
May mga bagay nga dapat batunon bisan indi kita makauyon. May magabagay nga indi naton naluyagan apang ini ang aton naauman.
Indi problema ang magpahayag sang hibubun-ot, sa kon ano ang nagabalabag sa aton pinsar apang tandan naton nga may kinamatarong man ang iban nga dapat hatagan man sang espasyo sa tunga sang mainit nga diskurso.
Hatagan naton sang higayon nga makatudlo si Atty. Liza Marcos. Basi pa lang magligwat pa man ang imo paglantaw sa iya kag tanan nga pasuni batok sa ila kon buksan naton ang aton pinsar sa mga bag-o nga ideya.
Indi naton pagdalukan ang aton kaugalingon nga makapanglakaton sa mas masangkad nga oportunidad. Kon daw mabudlay gid tunlon, mas nagakaangay nga magsaylo sa iban ng buluthuan kaysa sa mag-antus sa imo kaugalingon nga paglantaw sa sitwasyon.
Indi pagpabudlayi ang imo kaugalingon kon nagsarado na ang imo paminsaron. Malapad ang ganhaan sang buluthuan, hilway ka nga makabiya saw ala mo naluyagan. (bertladera@gmail.com/PN)
