ISA KA “Friend’s Request” sa Facebook sang sini lang ang nakakuha sang akon atensyon.
Nabalhag diri ang ngalan German Ray P. Gonzales Jr. sang Barotac Nuevo, Iloilo. Familiar kaayo ini nga ngalan sa akon, pati na ang iya nawong, gani maabtik ko nga gin-click ang “Accept”.
Bugtong nga anak si Ray ni anay Iloilo City Councilor German Gonzales (Sr.), isa ka suod nga abyan kag ka-kawsa kontra sa “establisiminento” sadtong estudyante pa kami.
Masami “Germs” ang tawag ko sa iya, kon indi “Man”, kag “Matt” kon tawgon man niya ako.
Pareho kami nga mga student leader sadto. Si Germs ang presidente sang student council sang University of the Phlippines, Iloilo City Campus. Ako naman ang presidente sang College Editors’ Guild of the Philippines, Iloilo Chapter. Kag bisan lain ang amon organisasyon, nagakilit-anay man kami sa mga madamo nga kawsa sang mga estudyante.
Suod gid kami nga mag-abyan ni Germs, kag sa masami ginakadtuan ko siya sa UP-Iloilo agud mag-istorya parti sa amon nga mga kawsa.
Sang magsaylo ako sa University of Iloilo sa kurso nga Education (Math major), halin sa Banking & Finance sa The Lincoln College, diri na kami nag-upod sa isa ka eskwelahan – ang UI. Wala matapos ni Germs ang iya Pol-Sci nga kurso sa UP-Iloilo kag diri na niya gintapos sa UI.
Diri sa UI, nangin Senate President ako sang UI Student Republic, samtang gapanguna man sa hublag estudyante si Germs sa College of Arts. Diri man kami nag-upod sa Sigma Rho Fraternity.
Sang magtapos kami sang amon mga kurso, nangin maestro ako anay sa kolehiyo sa subject nga The Life & Works of Dr. Jose P. Rizal sa UI, bag-o ako magsaylo sa Iloilo City (Molo) National High School sa pagtudlo sa Mathematics, partikular sa subject nga Geometry. Bati ko sadto konsehal na si Germs sa Barotac Nuevo.
Samtang nagatudlo ako sa ICNHS, nagkuha ako sing masteral sa Mathematics sa UI. Sa sina nga tinion (1970) nagainit na ang student activism kag ang enkwentro sa pulitika sang Nacionalista Party ni Presidente Ferdinand Marcos kag sang Liberal Party nga ginapangunahan ni Senador Benigno “Ninoy” Aquino.
Nag-untat ako sa akon masteral nga kurso kag nagsulod sa pagka-abogado sa UI. Sa second year na ako sang gin-deklarar ni Marcos ang martial law sadtong Setyembre 21, 1972.
Bag-o sining pagdeklarar ni Marcos sang martial law, kaupod ko si Germs sa radio column nga On the Air Force, sa diin gintalakay namon ang dalagku nga mga isyu bahin sa kagarukan sang gobyerno.
Sa mismo masunod nga adlaw sang martial law, samtang naga-program kami, may nag-abot nga Philippine Constabulary, kag ginpa-untat kami sang amon programa. Sa sina nga tion, gina-kritikar gid namon ang martial law.
Si Germs nagpauli sa ila lugar sa Barotac sa diin siya nadakpan sang mga militar ni Marcos nga naga-lecture sa katubuhan. Na-priso siya sa Camp Delgado upod sa isa man ka kolumnista sa radyo nga si Vic Mercado.
Ang nagamasakit ko nga iloy, nga anom ka tuig ang paghigda, kahibalo sang akon balatyagon kontra sa martial law kag gindestino niya ako anay sa uma namon sa Guimaras.
Sang mapatay ang akon iloy sadtong 1979, nagbalik ako sa siyudad sang Iloilo. Nag-upod ako kay Germs, nga sadto may programa liwat sa radyo. Nag-upod man ako sa mga hublag batok sa martial law regime ni Marcos.
Nag-konsehal si Germs sang Iloilo City sang matumba si Marcos sang Edsa Revolution. Ginpundar ko man ang Iloilo City Press Corps bilang reporter kag kolumnista sang Panay News. Ako man ang nagpundar sang Guimaras Press Corps. Nangin director man ako sang Iloilo Press Club. Kag nangin editor sang pila ka pamantalaan diri sa siyudad.
Sa karon, kolumnista ako gihapon sa Panay News. Sa pulong na ugaling nga Hiligaynon – for sentimental reason – pagkatapos sang pagsulat sa English sa sulod sang mga 30 ka tuig.
Si Brod German nagtaliwan sang pila na ka tuig nga nagligad, apang indi gihapon malipatan sang mga pumuluyo nga nanguna siya sa pag-away sa Panay Electric Company agud matagaan sila sing maayo nga serbisyo. Nalugaw-an siya, apang nagresulta man ini sa amat-amat nga pag-improbar sang serbisyo sang PECO. (w_mateojr@yahoo.com/PN)
