SA PAG-ISIP KO, apat ka dekada ang pag-abyanay namon ni Menchie. Gina-Menchie-menchie ko lang pero ang matuod, nagadayaw ako sina sa iya.
Siya si Dr. Carmencita Y. Robles, Dean sang College of Communication sang West Visayas State University. Pero antes sya nag-full time sa academe, bahin sya sang Iloilo media.
Nakilala ko siya sang 1979 bilang Production Assistant sang TV 12. Nagaisahanon lang sadto ang TV 12 nga TV station sa Iloilo. Didto ang TV internship ko bilang Mass Communication student sang St. Paul College of Iloilo. Didto ko una nakilala si Menchie.
Pagkatapos ko sa kolehiyo, nag-apply ako ugaling wala nakuha. Pero nagpabilin ako nga trainee writer samtang nagatambay. Assistant sya sadto ni Mike Del Mundo. Understudy nga ginhasa sa patag sang TV production. (Nahisayuran ko na lang sa haya nya ang pagpalab-ot ni Mike Del Mundo sang iya kasubo sa pagtaliwan ni Menchie nga iya understudy.) Si Mike ang naghasa sa iya sa TV prod tubtub nga lubos niya gintugyan kay Menchie ang obligasyon para magbalik sa Manila.
Nadumduman ko pa nga inadlaw pagkaligad sang trahedya sa pagkalugdang sang M/V Don Juan sadtong Abril 22, 1980, naga-demand siya sang video clip sang mga biktima, rescue and recovery. Kinahanglan mapakita sa TV ang aksyon, indi puede estorya lang. Disiplinado sya nga worker. Ang tagsa ka minuto o segundo, importante. Wala palagsanay. Dapat ang script ara na sa reader 30 minuto antes kag nabasa na. Production people ready, pati na ang technical people.
Sikat sadto ang mga TV anchors o news readers. Indi kitaon ang hitsura ni Menchie pero sa credits pagkatapos sang produksyon, naga-gua ang iya ngalan. Buot silingon, kon may tatak Menchie, may “quality”.
Nahatagan ako sang kahigayunan nga makasulod sa Bombo Radyo sang 1983. Sa masami nagatabuanay man ang amo banas sa conferences, KBP, coverage kag iban pa. Bisan sang iya popularidad nga ginaangkon bilang media person, indi sya bugalon. Seguro may yara gid man nga wala nakahangup sa iya bangud kon maghambal, ka-emphatic sa iya. Sa pamatyag ko, nahangpan man siya sang iban, kasubong sang mga male colleagues nya, bangud ginasunod man nila ang iya luyag nga matabo. Ayhan, pagkilala sa iya igkasarang man. Babaye man o lalaki. Bag-uhan lang o nagdugay na sa industriya… bangod ang media indi para sa isa nga nagasandig lamang sa iya laurels.
Palaisipan para sa akon kon ngaa ginpili niya ang magtrabaho sa Iloilo pagkatapos nga nag-graduate sya sa UP Diliman. Kontani yara na sya sa Corporate Communication kon sa diin mas mataas ang perks kag kita.
Samtang nagatrabaho sa IBC 12, ginsulod man ni Mechie ang pag-maestra. Nagtudlo sya sa Mass Communication program sang St. Paul Iloilo kag ginhanas ang bag-o nga mga talents. Lakip sa mga una niya nga estudyante sa St. Paul amo sanday Sexy Baybz sang Love Radio, Bernie Gampay sang 99.5 RF, IBC TV 12 News Director Marilou Arancillo (karon nagretiro na sa media), Erlyn Savariz-Alunan nga Tourism Officer sang San Joaquin, Bingbing Josue sang TV 12, Helen Romero, Cherryl Parangan nga karon Corporate Communications Officer sang is aka national telecom network, Tikya Aguirre sang GMA, Ruby Silubrico, Kathy Depol-Skytte kag madamo pa nga iban.
Nagtudlo man sya sa Mass Communication program sang West Visayas State College (WVSC) nga nag-produce sang una nga mga gruates kasubong nanday Jenil Demorito, Allyn Joy Oremo-Defensor, Bing Pabiona sang Radyo PIlipinas, Manny Alcalde, Elena Pellobello, kag iban pa.
Nagtudlo man sya sa University of Iloilo kag sa Central Philippine University.
Tagsa ka tuig nagadugang lang ang listahan sang mga sadto estudyante nya nga ara na karon sa Iloilo Media…indi lang basta mga reporters – kundi multi-awarded journalists kag ang iban sa ila mga Station Managers kag key persons sa ila natungdan nga media organizations. Sila amo sanday Ronil Sorbito sang RMN, Gemma Villanueva sang ABS-CBN, Joselito Yap a.k.a. Kuya James sang Panay Sikat, etc.
Ara pa si Nereo Lujan, Florence Hibionada, Julliebelle Dator, Edwin Laruan, Dennis Octaviano…hasta sa mga ulihing tubo nga sanday Jennifer Garcia, Regi Adosto, Bea Zarragosa, Zeny Quilantang, Joel Franco, Louine Hope Conserva, Joseph Paul Tarroza, Hope Torrechante kag iban pa.
Ang matuod, ang iban sa ila yara na karon sa mga information offices sang national government agencies o local government units.
May iban pa gid nga nagsaylo na karon sa legal profession samtang ang iban nagsulod na sa politika.
Sa apat ka unibersidad – St. Paul University Iloilo, University of Iloilo, Central Philippine University kag WVSU nagtudlo sya sang Mass Communication courses – Broadcasting, Film, Communication Theories. Agud mangin mayo nga mentor, naghimo siya sang Handbook on Production nga nagaserbe gabay sa mga estudyante.
Mapati kamo kag sa indi, bisan nga Dean na sya sang College of Communication sa WVSU, nagpamilit gid sya sadto nga mangin personal driver ko. Bilog nga adlaw nga suod-sunod niya sa akon kon diin ako makadto. Bisan malayo, dul-ong nya gihapon ako. Pati sa pagsaka sa City Hall nga regular beat ko, gin-updan man gihapon niya ako. Kontani silent observer lang sya, pero anhon mo ina? Kilala sya sang mga estudyante nya nga mga reporters nga naga-cover sang sessions sang Sangguniang Panlungsod. Pati Konsehal naga-acknowledge sang presence nya.
Ang matuod, indi lang ako ang ginsunod-sunod nya. Pila kami gawa nga women in Iloilo Media ang subject sang dissertation niya (nga requirement sa iya Ph.D).
Fulltime na sya sa West, pero nakatamod sa gihapon sa media ang panulok kag palamatin-an nya. Isa sa labing ulihi nga seminar nga gin-organize nya amo ang Refresher Course sa Hiligaynon. Suno sa iya, ang iban nga mga Hiligaynon daw sa na-bastradize na nga kontani bilang educator, tudluan sang media ang pumuluyo sang husto (indi nga amo pa ang pasimuno sa pag-corrupt sang pulong nga Hiligaynon.)
Matuod nga exemplary ang contribution ni Menchie sa Iloilo Media nga kadam-an sang mga katapo – sadto kag karon – mga ginpangtudluan nya.
Antes sang early ‘80s, kinagawian na sang mga sadto mga newscasters ang pagbasa sang English newspapers kag direkta nga gina-translate sa Hiligaynon samtang on-air. Ang nasambit nga practice indi lamang nagaresulta sang sayup nga translation kundi kon kaisa nagahatag sang sala nga interpretation. Tubtub nga nagbag-o sa pagsulod sang mga Mass Comm-educated media practitioners nga ang tagsa ka newscast dapat may ginabasa nga script kag kompleto sang audio ukon video support.
May 40 ka tuig man ang iya pagtudlo – halin part timer tubtub nga nangin Dean sya. Indi mapahigad ang iya contribution sa Ilonggo community paagi sa media (nga iya ginpangalagaran sang 25 ka tuig tubtub nag-amat sya saylo sa pagtudlo sang na-sequester ang IBC TV 12 upod sa iban nga Benedicto assets pagkaligad sang EDSA People Power Revolution) despues sa academe.
Ginkilala siya sang 2017 bilang Outstanding Ilongga. Isa sa The Outstanding Women of Iloilo City (TOWIL) sa patag sang Academe.
Bilang iya colleague sa media sa sulod sang 25 ka tuig, bugalon ako nga may katulad niya sa sini nga profession.
Pagpalangga kag pagtahud ang akon pabalon sa iya. Love for the time she mentored us unselfishly. Unmindful kon mas matayog pa ang nalab-utan sang iya estudyante.
Pasalamat kag saludo para sa isa ka Menchie Robles./PN
