BILIB kita kay Iloilo City Treasurer Jinny Hermano sa pag-amlig sa kaban (finances) sang siyudad sang Iloilo.
Tandaan ta pa sadtong Abril 2019 sang wala hadlok-hadlok nga gin-blanka sini si anay Mayor Jose Espinosa III sa legislative inquiry sang Sangguniang Panlungsod kon bala bayaran ang sweldo sang mga “excess job hires” ukon indi sa natalana nga quota sang kada departamento.
Siling niya nga indi niya mapasugtan nga pirmahan ang payroll sang mga “excess job hires”, nga gintugtan idugang sang administrasyon ni Mayor Espinosa sa idalom sang 2018 reenacted budget.
Ining mga dugang nga mga job hires naglab-ut sa 189 sadtong Enero 2019 kag 199 sang Pebrero 2019.
Ang balayran sang siyudad nga mga swedlo sa sining dugang nga job hires naglab-ut sa P784,000 para sa 189 sa ila kag P1,057,000 para sa 199.
Ginpilit ni Treasurer Jinny nga ipabilin ang kadamuon sang mga job hires nga gintalana lang sa 2018 reenacted budget.
Angot diri, ginbalewala man niya ang opinyon sang City Legal Office (CLO) kag DILG nga mapasugtan ang pagbayad sa mga sweldo sang mga “excess job hires”. Sunu sa ila, pwede man wala siya sing liability sa idalom sang kasuguan kon isulat sini ang iya objection.
Indi niya kuno mahimo ini, ugaling, kay kon himuon niya ini mawad-an sing pondo ang mga job hires sa masunod nga anom ka bulan kag wala naman siya mahatag sa ila sa pag-abot sinang tion.
Bilib a! imagine, gin-blanka niya ang CLO, ang DILG kag si Mayor Espinosa. Daw “genie” sa kapoderoso si Treasurer Jinny ba!
***
Bilib man kita kay Treasurer Jinny sang gin-pamulta gid niya ang isa ka senior citizen sang magpalya ini sa pagbayad sa burial fee sang iya tiya bisan pa sa paathag sini.
“Reklamo ka lang kay meyor kon luyag mo,” siling pa niya sa iya paathag nga amo gid ina ang ginapatuman nila nga wala exception.
Kon nagpalya man sa pagbayad ang 80 anyos nga tigulang, ina tungod wala ginbaton sang manugsukot ni Treasurer Jinny ang iya bayad nga abanse sadtong Nobyembre ukon Disyembre 2019 kay pwede man kuno sa 2020 lang ini himuon.
Masadya (nga indi masadya) kay nalimtan sang tigulang ang magbayad sang burial fee sa nitso sang iya tiya sa Tanza Cemetery – nga siya gid ang naga-atipan tungod wala na ini sing iya kaugalingon nga pamilya – pag-abot sang Enero 2020 tubtub sining ulihi.
Tungod seguro medyo mahina na ang memorya sang tigulang nga 80 anyos, nadumduman lang niya magbayad sining Agosto 3, 2020, nga natabo lang sang ulayhon siya nangayo sing prescription para sa iya maintenance sa kay Dra. Calsas sa inang adlaw mismo. Thanks Doc!
Kon nadumduman man niya sang ulihi, indi naman siya makagwa tungod ang siyudad nagdeklarar sang lockdown sang Marso, sa diin gina-prohibir ang paggwa sang mga senior citizen, tubtub ginpaluag-luag na ang regulasyon.
***
Gahatag gani kita 20 percent discount sa bulong sang senior citizen kag five percent sa grocery, discount sa electricity bill, ginlibre nga VAT, kag iban pa nga privelegio, ngaa abe indi gid mapasensyahan ni Treasurer Jinny ang ining senior citizen nga nag-ofrescer pa sa pagbayad abanse, ugaling lang kay wala pagbatuna.
Dapat tani natagaan pa ini sing discount sa pagbayad abanse. Pero, ginmulthan pa sang magbayad sang ulihi nga indi man siya mabasol tungod sa mga circumstancia.
“Not by the letter but the spirit of the law” ang tani gin-apply ni Treasurer Jinny, nga tapos sa abogasiya, sa kaso sining tigulang nga luyag magbayad sing abanse, ugaling lang kay wala pagbatuna, kag, in consequence, namultahan pa. Wala patawad matuod si Treasurer Genie, este, Jinny!
Nanotaran nman naton nga wala ngalan – nameplate ukon kasubong man nga paghingadlan – ang mga manugsukot ni Treasurer Jinny.
Ti, kay sin-o na lang maka-reklamo ang mga pumuluyo nga nagabayad sang ila fees kag buhis sa Treasurer’s Office? In fact, kon pamangkuton mo indi man gani maghatag sang ila ngalan kag pabudlayan ka pa sa pagpangutana dito sa sulod sa mga dalagku ulo.
Siling ko anay “transparency” nga polisa ang ginapatuman sa Treasurer’s Office. Ti, ngaa wala sing luyag maghatag sing ngalan ang nagreklamo nga tigulang sa mga empleyado mo, Treasurer Jinny?/PN
