NAGAATUBANG sa karon si Iloilo City Councilor Jojo Javellana, nga anay barangay captain man, sang akusasyon nga kuno may “illegal connection” ang water-refilling station nila sa Barangay Loboc.
Ang ining water-refilling ginapanag-iyahan niya kag sang iya asawa nga si Mary Tracy Javellana nga karon barangay kapitan sa Barangay Loboc, Bo. Obrero.
Mabug-at ini nga akusasyon. Sunu sa Republic Act 7832 (Anti-Pilferage of Electricity and Theft of Electric Tranmission Lines/Materials Act of 1994), ang penalidad sa mga violators galakip sang prision mayor (six months and one day to six years), ukon ang multa (fine) nga P10,000 tubtub P20,000. ukon duha gid sini, sa discretion sang korte.
Kalakip ini nga akusasyon kay konsehal sa mga 3,000 nga kuno “illegal connections” man nga nadiskubrihan, nga nagaulamid man gani sang pila pa ka barangay officials.
***
Admittedly, wala gid naton matagaan anay sing atensyon ang ining reklamo batok sa kay Councilor Javellana tungod sang madamo nga mga isyu sa nasyonal nga level, labi na gid ang parti sa pandemic kag sang conflicto sang China kag Filipinas sa West Philippine Sea, nga importante man sa aton mga pumuluyo diri sa rehiyon. Tutal ginatutokan naman ining isyu sang mga kaupdanan naton sa lokal nga media nga wala naman kita sing daw madugang pa.
Ugaling kay may nag-ungkat gid sining isyu nga luyag gid makahibalo sang aton panghuna-huna parti sini.
Imposible kuno nga mahimo ini ni Kap, sunu sa iya. Una, tungod limpyo kuno ang record ni Kap sa madugay na niya nga pagserbisyo bilang isa man anay ka barangay captain. Hayag man, siling pa niya, halin sadto pa ang pagpangabuhi ni Kap kag sang iya asawa, lakip ang ining ila negosyo, nga indi man malikom pa sa mga pumuluyo.
Ikaduha, may outstanding ini nga application para sa isa ka electric meter sa MORE Power sa ila water-refilling nga negosyo.
Ikatatlo, wala man kinahanglan magdiskarte pa, kon posible himuon gid man ini, kay may submeter man ang mag-asawa nga gintugtan ipaangot sa mother meter sang isa ka abyan nga nagabayad tingub sini sa MORE Power.
Ikaapat, dugay naman gani kuno nga wala naga-operate ang ila water-refilling station tubtub sining ulihi, ti paano nga maggamit pa sang kuryente ang ining ila negosyo, labi na gid kon sa ilegal nga paagi.
In other words, wala gid sila matuod sing rason agud mag-angot, ukon magpaangot, sang “illegal connection” sa linya sang MORE Power.
Pero, ano atong nadiskubrihan kuno sang tinawo sang MORE Power nga electricity connection sa linya sang MORE Power nga wala nagaagi sa electric meter?
“Ambot kon sin-o ang nag-angot ukon nagpaangot sadto,” sabat sang nag-ungkat sa aton sining isyu. “Natural indi sila, kay wala naman sila kinahanglan magkuha sang kuryente sa kon diin pa luas paagi sa submeter nga ginabayaran sang ila abyan sing tingub sa MORE Power.”
“Sin-o ayhan ang nag-angot, ukon nagpaangot, sadto?” pamangkot ko. “May suspetso ka?” dugang ko.
Pulitiko si Jojo kag si Mrs. Posible nga may luyag gid mag-sabotahe sa ila, labi na gid kay malapit na ang eleksyon sa Mayo 2022, paathag niya.
Isa pa, dugang niya, pwede man makwartahan ina nga isyu. Nga daan may ginahatag ang MORE Power sing premyo (mga P10,000 kuno) sa kon sin-o ang makatudlo sang nagapang-“illegal connection”.
Daku ina nga kwarta nga makatentar sang isa ka tawo agud saskuhan ang kapareho, labi na gid ang may gut-gut sa ila nga mag-asawa.
Kon indi sila ang nag-angot sang “illegal connection”,ukon nagsugo sini, sin-o matuod?
Malayo seguro sa aton pamensaron, apang, for the sake of curiosity lang, indi ayhan ang tinawo pa sang MORE ang nagdiskarte sini nga kasosyo ang nagmaneho sining “illegal connection” agud partehon nila ang premyo?
Basi pang-sabotahe lang ini matuod agud mamansahan ang limpyo nga ngalan sang mag-asawa sa malain nga plano sang iban batok sa ila, labi na gid kay mabudlay ini sila bungguon sa palaabuton nga eleksyon sa Mayo 2022.
Meantime, may sabat na gid man seguro ang abogado ni Kap sa akusasyon sang MORE Power./PN
