MAGUTOK na ang syudad sang Iloilo, madamo sang tumalan-aw nga luyag makasaksi sa pagpasundayag sang mga nagpasakop nga mga tribu.
Kadungan sang sini nga selebrasyon ang pagpamentaha sang mga kandidato nga luyag ipahanumdom ang ila ngalan sa mga botante. Nagasab-it sila sang madamo nga tarpaulin, gamay man ukon daku, nga tuman kaathag sang ila ngalan.
Kunsabagay, kon indi panahon sang piniliay, wala man sang may magapasaway kag magapamentaha sa selebrasyon.
Apang kon may mapag-on nga pagpatuman sang patakaran ukon polisiya, kag kon nakahangop ang nagapatuman sang mga patakaran, wala sang pulitiko nga magatilaw sa pagpadungol.
Matuod gid man nga ang selebrasyon napatuhoy sa pagpasidungog kay Senior Santo Niño. Kinaandan nga pagsaulog sang mga Ilonggo, may eleksyon man ukon wala.
Nakahibalo ang tanan nga pila na ka pulitiko ang nagbulos-bulos sa pagpanguna sa selebrasyon, apang ang okasyon nagapabilin nga mapag-on kag wala nalingkang sa mga nagapamuno. Bangud ini napasad sa debosyon, sa kultura kag sa pagpaninguha nga mangin mapag-on ang selebrasyon apisar sang paglipas sang mga dinag-on.
Indi man bungol ang city government rason nga sila ang nagpamati sa mga yamo kag reklamo tuhoy sa malawig nga pamulong-pulong sang mga kandidato. Ginlimitahan ini sa duha tubtub tatlo ka minutos kag dapat ang kaundan sang mensahe nasandig sa kon ano ang tema sang selebrasyon.
Nagakadapat nga aton obserbahan kon bala ang patakaran sang city government ang ginsunod sang ila mga imbitado nga mga bisita.
Bangud nga indi luyag ni Mayor Jose Espinosa III nga maakusaran nga nagapamulitika rason nga wala siya sang pagdumili sa mga luyag magpagkit sang ila mga tarpaulin sa palibot sang venue ukon sa mga judging area kag sa mayor nga dalanon nga ginalababayan sang parada.
Ang iya panindugan ang supak naman sa tindog sang Iloilo Dinagyang Foundation Inc. Nagpagwa sila sang official statement tuhoy sa festival kag sa early political campaigning.
Ginsiling sang IDFI nga ang festival tuman ka importante nga cultural kag religious celebration sang mga Ilonggo.
Wala gintugutan ang mga kandidato nga mag-upod sa parada, wala man ginatugutan ang anuman nga campaign materials kag wala gina-abi-abi ang mga ‘Epal” sa sini nga selebrasyon.
Dapat nga lip-ot lang ang pamulong-pulong sang mga pulitiko kag ang presensya nila indi dapat nga pasayang-sayang sa mga tumalan-aw.
Tandaan dapat sang mga political strategies sang mga kandidato nga wala gana ang mga tumalan-aw sa anuman nga political circus kag diskurso sa kampanya bangud ang ila ginkadto amo ang pagpasundayag sang mga tribu kag indi ang presensya kag litanya sang mga kandidato.
Ginapangabay sang IDFI sa tanan nga partido kag mga kandidato nga likawan ang pagpalapta sang ila mga campaign materials kag kakason ang mga tarpaulin nga nagapahigko sa dalanon sang syudad.
Madamo sang higayon ang mga kandidato sa ila pagkampanya pagkatapos sang Dinagyang Festival.
Kuntani magmanton na ang mga lideres sa syudad sang Iloilo. Kuntani indi sila magpagamit sa mga kaangay nila nga kandidato bangud indi sila ang Dinagyang Festival, kundi ang mga Ilonggo.
Indi pagkalipatan nga ang Dinagyang Festival tion sang pagsinadya kag indi sang pagkampanya. (bertladera@gmail.com/PN)
