NAPUKAW ang mahamook nga katulugon sang mga nagadumala sa Transportation Management and Traffic Regulations Office ukon TMTRO matapos nga mismo si City Administrator Atty. Hernando Galvez ang nakadakop sa isa ka traffic aide nga nagsakay sa Jaro CPU nga jeep nga wala nagplete apang nagbaton pa sang 10 ka pesos gikan sa driver.
Madugay na ini nga nagakatabu apang wala lang sang mga opisyales sa city hall ang nagahatag sang atensyon bangud sa mga masaku nga tulumanon kag mga madamo nga hilikuton.
Gindemalas lamang ang nadakpan bangud siya ang nasiplatan, ginsundan tubtub nga gintundaan sa iya nahimo nga kasaypanan.
Kulang sa kontrol kag pagmonitor ang TMTRO sa ila mga tinawo, wala sang mekanismo kon paano mabantayan ang kada isa kon may nagabuhat sang indi maayo sa ila trabaho. Wala sang may nagatsekyar sa ila sa regular nga higayon agud matapna kon may yara sang mga malain nga bukho nga luyag himuon.
Pamatyag sang mga traffic aide daw wala man sang labot sa ila ang city government bangud nga sige man ang ila nga sweldo kag wala man sang may nagatsekyar sa ila aktibidades.
Dapat may yara sang programa ang TMTRO kon paano mabantayan ang ila kaugalingon nga mga tinawo. Kahibalo kita nga problemado ang pagsolbar sa lakat sang trapiko sa syudad, apang mas malala ang problema kon ang nagadumala sa trapiko ang imbolbado sa sindikato nga pagsinarayo.
Paano nila madisiplina ang mga salawayon nga driver sang mga salakyan, pribado man ukon pampasahero, kon sila mismo ang masilaw sa inggat sang kwarta. Wala sang dakpanay nga nagakatabu, lunsay na lang areguluhanay. May nagatan-ay kon pila, may nagabaton sag kwarta.
Samtang nagapadayon ang ini nga hitabu, nagalaton sa iban pa nga driver ang sitwasyon nga sa ulihi mangin isa na ka normal mga sistema sa mga dalanon.
Madamo sang padugi ang mga traffic aide. May yara sang nagabaligya sang tubig kag kararuton nga ang ang bili duha ka beses sa orihinal nga presyo bangud nga ang katunga sang ila bayad nagakadto sa ginatunga-tunga sang grupo sang traffic aide.
Natabu na ini sadto. Gintipon ang mga traffic aide kag ginpaandaman. Gintipon man sila kag liwat nga ginhanas kag ginhatagan sang panugyan sa ila papel sa dalan kag kon paano madumala sing maayo ang lakat sang trapiko.
Ginkakas ang mga wala nagatuman sang husto, gin-islan sang mga bag-o apang ang mga bag-uhan sa karon amo naman ang nalatnan sa indi maayo nga buluhaton sang mga nauna sa ila sa serbisyo.
Gin-aku sang nadakpan nga nalatnan siya sa buluhaton, ginasugo siya sang mga nauna sa iya, kag ginatunga nila ang kwarta nga ila nga makaganar sa bug-os nga adlaw.
Dapat nga unahon sang city govenment nga limpyuhan ang sagbot sa TMTRO, dapat una nga solbaron ang sikwawi nga ilig sang ila panimuot agud nga mangin tayuyon ang ila pagdumala sa ilig sang trapiko sa dalan.
Dapat nga bungkason sang Public Safety and Transportation Management Office ang sindikato nga nagadagta sa imahen sang TMTRO. (bertladera@gmail.com/PN)
