SA KULTURA naton nga mga Filipino ang maghatag sing respeto sa nagtaliwan kag ang pagpangamuyo sa kaluwasan sang iya kalag.
In fact, naandan na naton ang magsiling sing “Kaluy-an ka sang Ginoo!” nga patuhoy sa kaluwasan sang iya kalag. Kag ina mapatuhoy man naton gani bisan pa sa ginakaugtan ukon kaaway!
Pero, ngaa ipangamuyo pa naton ang kaluwasan sang mga ginakaugtan kag kaaway naton?
Bangod ina sa tudlo man sang aton Ginoo: “Judge and you will be judged!” kag “Forgive and you shall be forgiven”.
Nagapati man kita, labi na gid ang mga catolico, nga ang pagpangamuyo sang kadam-an sa kaluwasan sang kalag sang nagtaliwan daku nga bulig ini agud mapahumok ang balatyagon sang Ginoo sa iya kasal-anan, nga sa lugar magtupa sa Impyerno basi sa Purgatoryo na lang. Kag kon nagtupa siya sa Pugatoryo, sa mas malip-ut na lang nga panahon bag-o siya makasaka sa Langit upod na ang Ginoo sa Iya wala tupong nga Himaya.
Of course, kinamatarong man sang isa tawo ang magdumdum kag magpahayag sang iya kaisipan sa nakasala nga namatay.
May tion dira, ugaling, sunu mismo sa Bibliya: “Ang tanan may bagay nga panahon”.
May panahon sa paghatag sing respeto sa nagtaliwan kag sang iya mga himata kag mga abyan. May panahon man sa dutan-on ta nga balatyagon agud mapautwas ang aton kalain sang buot sa madumduman nga nagliligad. Ugaling, sa bagay lang nga tion kag lugar.
Indi kay samtang ginahayaan pa lang ang nagtaliwan dira mo pa idungan ang imo pagpakalain sa iya, labi na gid sa publiko, nga indi makahulat sa pagbatak sang lalaw (mourning).
Katulad sang ginhimo sang isa ka abogado nga kapartido ni Presidente Dutarte sa pagpabando gid sa kahanginan nga napatay si PNoy sa HIV/AIDS, nga isa ka malala nga balatian nga pwede makuha sa bawal nga relasyon sa kapareho nga lalake nga luyag sini ipahangop.
Indi ini matuod! Patu-pato kag panghalit lang ini. Ang sertipiko sang kamatayon ni PNoy nagasiling nga napatay siya tungod sa “renal failure secondary to diabetes”.
Indi naton mahangpan ang kaakig sining abogado sa kay PNoy samtang nagakasubo pa ang iya pamilya kag mga abyan.
Si President Duterte, nga kontra gid sa pulitika ang mga Aquino, nagpaabot pa gani sing maayo nga pahayag parti sa pagtaliwan ni PNoy kag nag-anunsyar pa sang kasubo sang Palasyo. Bisan si Senadora Imee Marcos, nga ang amay ginpabangdan nga nagpapatay kay anay Senador Ninoy Aquino, nagdayaw pa gani kay PNoy, nga gintawag niya nga “mabuot”.
Kon indi buang ining abogado nga ini, basi si Taning ini nga nagapakuno-kuno lang kag, kon indi man, tinawo ini seguro ni Taning nga may espesyal nga misyon agud pakalainon ang Diyosnon nga Presidente.
Tani mapa-disbar ining abogado sa iya masakit nga kabutigan batok kay PNoy.
***
Wala sing perfecto nga tawo. Labi na gid kon nagauyat ka sang daku nga responsibilidad, katulad sang isa ka Presidente sang isa ka pigado nga pungsod, katulad sang Filipinas, nga wala-tuo ang problema.
Kon sa bagay, natural man lang gani nga ma-isyuhan ka sang mga kontra sa pulitika, pero wala lang tani yadtong mga mapintas nga kabutigan kag pang-insulto sang mga trolls batok kay PNoy sa iya pagtaliwan. Unfair ina ya kag indi bagay, labi na gid halin sa mga kuno Diyosnon man nga mga pangontra.
Indi man perfecto si PNoy, no doubt!
Nonetheless, may mga dalayawon man parti kay PNoy, katulad sang pagpanikasug niya nga matagaan sing legal nga tindug ang aton soberanya sa 200-mile nga Exclusive Economic Zone sa West Philippine Sea sa pagdaug sang aton kaso sa Hague Tribunal sadtong 2016; ang pagpasangkad sang 4Ps para sa labing kubos; ang pagpatambok sang ekonomiya nga ginapasalamatan gid sang mga negosyante; pagduso sang katumanan sang Bangsamoro sa Mindanao; kag ang padayon nga pagpabaskug sang Demokrasya diri sa pungsod sa iya panahon.
Luyag ta man idugang diri ang aton panugdaon sa FB blog site sang isa ka abyan, nga nagatumod kay PNoy nga: “Son of a father who chose to die than abandon his people and of a mother who while bequeathed with enormous power chose to have less than it in recognition of the majesty of the people, as he himself inherited and lived true their immeasurable love for country and Democracy. Rest in peace, President Noy!”/PN
