ANG experyensya sang Maginhawa Community Pantry kag sang iya sang aktres nga si Angel Locsin sa pag-selebrar sang iya birthday nagapakita nga mabudlay ipatuman ang mga ini para sa kaayuhan sang dapat buligan.
In fact, ang indi ma-kontrol nga pag-abot kag pagdinaguso sang mga tawo ginkabangdan pa sang kamatayon sang isa ka senior citizen sa community pantry ni Angel Locsin.
Isa pa, indi man naton maseguro dira kon sin-o gid ang bagay nga buligan sang bisan pang-kusina lang nila nga kinahanglanon.
Sa madamo nga okasyon gani, sa pagbulig sa mga nahalitan sang kalamidad, ang madamo sa matuod nga bululigan ang indi pa makabaton sing bulig kay una pa sa linya sang pila ang indi kinahanglan buligan.
Well, indi gid man seguro naton mapunggan ang padayon nga pagtuhaw sang mga community pantry, labi na gid sa panahon nga ini sang pandemic. Amlig lang kita agud masunod gid ang health protocol sa padayon ta nga away sa COVID-19.
Luyag man kita magpahanumdum sa aton mga organizer nga medyosan gid nila nga ang makabaton bulig amo gid ang may kinahanglan sini.
Katulad abe sa luyag ta man buligan, dungan ukon sunod sa sining community pantry, ang mga kabataan nga indi mapakaon sing husto sang ila kubos sa pangabuhi nga mga ginikanan.
Ang aton pobre nga mga tigulang luyag man seguro magpangape-kape sa kaagahon upod ang pandesal nga amo lang ang pamahaw sang iban.
Sa nahibal-an naton, may mga eskwelahan publiko sa elementarya nga nagahatag sing “full breakfast” ukon bisan “snack” lang sa sining kabataan sang kubos nga panimalay.
Wala ugaling sang kasubong nga proyekto ang aton gobyerno sa mga kabataan nga wala pa nagasulod sa buluthuan.
Diri, pwede seguro magbulos-bulos sponsor ang mga pribado nga indibidwal ukon grupo nga may ikasarang agud magtukod sang “soup kitchen” nga makabulig hatag sang masustansya nga pamahaw sa sining mga kabataan, bisan kis-a lang kada semana.
Ang ining mga kabataan sang kubos nga mga panimalay, ang masami indi matagaan sing husto nga pagkaon nga nagaapekto sa ila ikaayong lawas kag husto nga pagdaku.
Por ejemplo, sunu sa 7th National Nutrition Survey sangFood andNutrition Researh Institute (FNRI) sang Dept. of Science and Technology (DOST), 3 sa 10 sa mga kabataan may edad 5 ka tuig panubo kulang sa kataason, nga patimaan sang ila kakulang sang protina sa ila pagkaon.
Sunu sa FNRI, 38 ka gramo sang kumpleto nga protina ang kinahanglan sining mga kabataan, nga makuha sa itlog, manok, baka, baboy kag isda, lakip na ang munggo kag mani, nga pwede madugang sa pagkaon nila sa masustansya nga sopas kag tinapay, katulad sang e-nutrition buns sang gobyerno, nga mahatag sa ila sa “soup kitchen”.
Walo man sa 10 sang mga Filipino ang kulang sa Vitamin A nga nagapasinaw sang panan-aw, maayo nga pagdaku kag pang-away sa balatian sang mga kabataan, kag bisan pa gani sang mga may edad na.
Makuha ining Vitamin A, sunu sa FNRI, sa kalabasa,carrots, pula nga itlog, berde kag madahon nga mga utan kag VitaminA-fortfied nga gatas, nga madugang man sa sining “soup kitchen” nga pwede ma-sponsoran sang pribado nga mga indibidwal ukon grupo. Pwede ini hiwaton sa gym sang barangay.
Malipay man seguro ang aton pobre nga mga senior citizen nga mainitan ang ila tiyan kon matagaan sang isa ka tasa nga kape kag pandesal kada aga bag-o ang lubos nga pamahaw.
***
By the way, experyensya sa kaumhan ang magkini sa pagkaon sa panahon sang tagkaliwi sa bulan sang Hunyo tubtub Agosto sa Western Visayas.
Sa lugar nga tatlo ka beses magkaon sa isa ka adlaw, kaduha na lang – painit-init lang anay sing sara-sara (sinanlag nga bugas) nga ga-serbi kape kag mamahaw ugaling dala panyaga sa mga a las 10 sa aga, kag panyapon sa pag-abot sang a las 5 sang hapon.
Sa masami, ang ginakaon nla sa sining panahon bilang kan-on amo ang ginabugas nga mais, nga mabakal sa siyudad, nga maka sustener sing madugay tungod kay madugay ini matunaw.
Para sa mga taga-uma sa Guimaras, okey lang sa ila ang ining klase sang pag-antos. Gabawi lang sa pag-abot sang maayo nga panahon. Take it from me kon indi kamo magpati sa sugid sang iban./PN
