NAAPRUBAHAN na ang resolusyon nga naga-deklarar sang State of Calamity sa siyudad sang Iloilo.
Partikular ini sa problema sang kakulang sang tubig sa pagsulod liwat sang El Niño Phenomenon diri sa siyudad sugod pa sadtong Abril nga amat-amat nagalala tubtub subong.
Gin-predict gani sang Pag-asa nga magaluntad ini sa sulod sang tatlo ka bulan tubtub sa Hunyo.
Nagapuyo kita sa isa ka Demokrasya kag, syempre, normal lang ang pagbungguanay sang intereses sa panghimanwa agud matungkad gid ang kamatuoran. Kag agud man malikawan ang ano man nga kalainan, hungod man ukon indi, para sa kaayuhan sang mga pumuluyo.
In fact, gina-kwestyon gani sang pihak nga kampo kon bala balido ang resolusyon nga naga-deklarar sang State of Calamity angot sa kakulangan sang tubig.
Ugaling lang, naaprubahan na ang resolusyon kag napirmahan na ni meyor.
Ang mahimo na lang sang pihak nga kampo amo ang seguruhon nga wala sing pinilian ang pagtatap sa kinahanglanon sang mga pumuluyo, kag kon paano amligan ang kwarta sang banwa.
Ina tungod indi na naton mapunggan ang pagpatuman sini sa karon.
Tungod man ini sa legal presumption of regularity sang akto sang mga opisyales sang gobyerno.
Ang presumption of regularity nagasiling nga ang mga akto sang mga opisyales sa gobyerno ginakabig nga lawful (santu sa kasuguan) tubtub mapawala, kon mapawala gid man, sang korte.
***
Samtang, ginpahayag ni Councilor Love Baronda, sang mag-preside siya sa meeting sang City Disaster Risk and Management (CDRRM) Council, nga wala makalab-ut sa “calamity portion” ang halit sining kakulangan sang tubig.
Siling niya, apat lang ka barangay ang nagreklamo – isa lang ang nagpasar sang resolusyon nga naga-deklarar sang State of Calamity sa barangay, kag tatlo ang nangayo lang ayuda sang gobyerno sang siyudad.
Sa report ugaling sang CRRDM, nga ginapangunahan ni Ms. Donna Magno, kag ni City Agriculturist Romulo Pangantihon, sadtong special session sang Sanggunian sang Biyernes, Abril 26, ginsugid nila nga nalab-ut na ang “calamity proportion” sang kahalitan sa pumuluyo. Amo ini ang ginpatihan sang walo ka konsehal sa ila pagpasar sang resolusyon.
***
Samtang, plano subong sang grupo nanday Vice Mayor Jeffrey Ganzon kag anom ka konsehal nga ipasaka ang ila reklamo sa DILG kag CDRRM Central Office sa Metro Manila agud kwestyunon ang quorum sang paghiwat sang special session sadtong Abril 26.
Ang quorum amo ina ang “minimum nga majority” sang nagapasakop sa isa ka miting agud maka-aksyon sing opisyal sa ano man nga kinahanglan pasaran nila sang resolusyon ukon kasuguan.
Ang general rule amo nga ang quorum nagadamo sing katunga sang nagapasakop plus ang isa ka boto (one-half plus 1).
Ang Sanggunian may myembro nga 15 ka tawo – 12 ka elective officials, duha ka ex-officio (Liga kag SK) kag si vice mayor (presiding officer). Ti ano ang pag-isip sang mayoriya? Lakip bala ang presiding officer sa isip sang mayoriya?
Sa nagtambong nga walo (8) ka konsehal, wala sing quorum sa nagtambong sa special session sunu sa grupo nanday Vice Mayor Ganzon.
Siling nila nga, samtang ang katunga plus 1 nagalab-ut sa minimo nga 8, indi maisip nga may quorum ini kay indi maisip ang Presiding Officer nga tal-os ni VM Ganzon nga si Councilor RLeoni Gerochi.
Pitu lang ang masiling nga “deliberating and voting members”, sunu sa tagmaba gani nila nga si Atty. Rommel Duron.
Ang Pambansang Blg. 337 sadto nagasiling nga ang local vice chief executive (katulad sang Vice Mayor) isa ka “ex-officio member with all the rights, duties and privileges of any other member thereof”.
Tungod sini ang Vice Mayor may dual personality bilang ex-officio member sang Sanggunian kag Presiding Officer, nga pwede maka-break sang tie (patas) sa botohay.
Gin-amendar ugaling ini sang RA 7160 nga naghimo sang local vice chief executive nga isa lang ka “composite member (indi regular ukon ex-officio lang)” kag “Presiding Officer” lang.
Tungod sini, sa pagpati sang grupo ni Vice Mayor Ganzon, kay indi regular ukon bisan ex-officio member sang Sanggunian si Vice Mayor, ang sal-i ukon substitute sa iya indi man maisip sa quorum.
Of course, kinahanglan maathagan gid ini sang publiko sa ining ila pagpasaka sang reklamo sa DILG kag CDRRM Central Office. (w_mateojr@yahoo.com/PN)
