CONGRATULATIONS sa siyudad sang Iloilo, sa pagpanguna ni Mayor Jerry P. Treñas, sa pagdaug sini sang ASEAN Clean Tourist City Award 2020-2022.
Ang ining pagpadungog sa siyudad pagabatunon ni Mayor Treñas sa Empire Hotel and Country Club sa Bandar Seri Begawan, Brunei sa Enero 16 sang sunod nga tuig, 2020.
***
Dapat mas interesado kita sa “rehabilitation and treatment” sang mga drug addicts, nga ang iban sini indi lang nagagamit sang droga kundi mga pusher gid, sangsa pamatyon sila sunu sa masami nga pamahog ni Presidente Duterte nga “I will kill you!”
Una nga rason syempre amo ang aton pagtaha sa kasuguan sang Diyos nga “Thou shalt not kill!”, ukon ang indi pagpatay sang pareho mientras mahimo.
Gani, dapat medyosan gid nga madakop lang sila sa nagakaigu nga paagi, ukon paagi sa “due process”, kag pasabton sang ila kasal-anan sa husgado, kag silutan lang sang nagakaigu sunu sa aton kodigo penal.
Ikaduha nga rason amo nga dapat nga maseguro naton ang pagpamatuod ta sa kasal-anan sang isa ka tawo. Indi naton mahimo ini sunu lang sa sugid sang iban kag bisan gani sa aton personal nga pagkakita. Posible magsala kita sa una nga pagkakita lang kag dayon sila pitkan sang gatilo sa diutay lang nga paglikday.
Ikatlo nga rason, sala ang pagpati nga indi na mabulong ining mga drug addicts kag basta na lang padayon nga mauyong sa kriminal nga mga buluhaton.
Ang aton mga doktor, nga mas nakahibalo, nagapasalig gani nga mabulong pa sila. Amo gani nga pasyente lang ang pagtratar sa ila. In fact, pwede mag-ayo ang iban sa ila sa sulod lang sang pila ka bulan kon magsunod lang sa panugyan sang doktor kag makabalik na sa mainstream society.
***
Gani, ginakalipay gid naton ang ining proyekto sang Bacolod nga nagatukod sang isa ka state-of-the-art Rehabilitation and Treatment Center para sa mga drug addicts.
Ang hangop naton sa balita amo nga nahauna ini nga proyekto ng may kasubong nga espesyal nga pagtatap sa aton mga drug addicts sa Western Visayas.
Gingastuhan ini sing mga P35 ka milyon kag ginatawag nga Bacolod City Drug Treatment and Rehabilitation Center.
Ginabanta nga operational na ini sa masunod nga tuig. Sa karon, ginbalita gani nga mga 75 ka porsyento na ini nga human.
Gin-pondohan ini nga proyekto sang Dangerous Drugs Board halin sa sa pondo man sang Philippine Amusement and Gaming Corporation, Philippine Charity Sweepstakes, kag Philippine Racing Commission nga kabahin sang ila kapareho nga proyekto para sa bug-os nga pungsod.
Kon nauna ang Bacolod, indi seguro tungod mas daku gid ang ila problema sa mga drug addicts. Basi lang tungod mas malapit ini sa pagtamod ni Presidente Duterte nga masami nagatambong sa importante nga mga okasyon sa Bacolod.
Maayo seguro hingagawon man ni Mayor Treñas nga matukod ini sa siyudad kay may problema man kita diri sa drug addiction.
***
Suu kay project engineer Loben Rafael Castillo, ang center may duha ka dormitorio – isa sa mga lalake kag isa man para sa mga babaye nga maka-akomodar sang mga 50 ka pasyente.
Ini nga proyekto nga ginatukod sa Barangay Alijis may ara man sing administration building kag mess building. Isa ka multipurpose hall kag pavilion ang idugang pa diri.
Ang Bacolod nagapatukod man sa karon sang isa ka Balay Silangan drug reformation center sa bulig sang Philippine Drug Enforcement Agency (PDEA).
Ini nga facilidad magatindug sa tupad sang Bacolod City Police Office compound sa Barangay Singcang-Airport, nga gastuhan sing P5 ka milyon. (w_mateojr@yahoo.com/PN)
