GINSAWAY lang ini siya ni Lady Vice President Leni Robredo kon ngaa ginpa-kanselar gid niya ang courtesy passport ni former Secretary Albert Del Rosario pagkatapos nga ginbalibaran ang naulihi sang Hong Kong immigration sa pagsulod diri.
Aba kag nag-amok gid si Department of Foreign Affair Secretary Teodoro Locsin!
Wala kuno niya gin-single out si Del Rosario kay ipatuman man niya ini sa iban nga diplomat nga may courtesy passport. Pero ngaa amo gid yadto ang iya pagpasipala sa aton Lady Vice President?
Daw indi siya gentleman sa iya pagtratar sa aton Vice President bisan sa pagka-babaye lang sini. Wala man siya gani sing bisan gamay nga respeto sa aton Second Highest leader sang pungsod sa iya pinamulong. In fact, indi lang ato insulto sa kay Vice President kundi sa minilyon man nga pumuluyo nga nagboto kag nagpadaug sa iya.
Gintawag ni Locsin ang aton Lady Vice President nga “boba”, meaning “stupid”.
Siling pa niya: “Please do her the kindness to give her a brain!” Sa aton pa, “Palihog (sa publiko) nga hatagan ini sing utok!”
Manami ayhan yadto pamatian sang minilyon ta nga mga pumuluyo nga nagboto kag naga-palangga sa aton Vice President?
Dapat ginpaathag niya sing maayo – indi kay magbinastos – kon ngaa amo yadto ang pagtan-aw sang aton Vice President sa pagpa-kanselar niya sang courtesy passport ni Del Rosario.
Pareho seguro sa pag-explikar niya sa Hong Kong immigration kon ngaa ginbalibaran gid sini ang pagsulod sa Hong Kong ni Del Rosario, nga isa sang ginataha ta nga former Secretary, even just out of diplomatic gesture sa pareho nga Filipino official, agud indi man ini mahuy-an.
***
Indi man bagay ang tawag nga “stupid” sa Vice President. Abogada si VP Leni kag indi ta man seguro masiling nga “stupid”. Halos makalab-ut sing 15 porsyento lang ang nagakapasar sa abogasiya sa Filipinas. Ti, “stupid” bala ini?
Kag paano nangin “stupid” ang pagtugda ni Vice President sa hinali lang nga pagpa-kanselar ni Locsin sang passport ni Del Rosario.
May rason ang Vice President sa iya pagtugda nga “knee jerk” yadtong pagpa-kanselar sang passport ni Del Rosario tungod gapati siya nga ang rason posible amo ang kaso ni Del Rosario batok sa Tsina.
“Cancelling courtesy diplomatic passports after China refused entry to former Secretary Albert del Rosario is not promoting professionalism but justifying cowardice,” siling gani sang spokesperson ni Vice President.
Si Del Rosario kag si anay Ombudsman Conchita Carpio Morales, sa nahibal-an na sang publiko, mga staunch critic sang Tsina, nga gina-amligan gid sang Duterte Administration nga indi masaklaw sa ila hulag kon pwede lang.
Ining duha nag-file sang complaint sa International Criminal Court batok kay Chinese President Xi Jinping, nga gin-akusar nila sing “crimes against humanity”.
Ina tungod sang “Chinese aggression” batok sa mangingisda nga mga Filipino kag pagguba sang marine resources naton sa West Philippine Sea, nga sakop sang aton 200-mile Exclusive Econmic Zone.
***
Mahangpan ta ang pag-kritikar sang ordinaryo nga pumuluyo sa aton mga opisyales sa gobyerno tungod sa aton Demokrasya ang mga pumuluyo amo ang amo, kag suluguon lang sang mga pumuluyo ang gobyerno.
Apang indi sa lugar ni Locsin nga manubo nga opisyal sa gobyerno ang mang-insulto sa isa ka mas may mataas pa nga ranggo sa iya sa gobyerno, katulad ni Vice President Robredo.
Dapat disiplinahon ni Presidente Digong si DFA Sec. Locsin sa iya wala respeto nga pinamulong batok kay VP Leni. Of course, depende sa kay President Digong kon ano kabug-at ang pagtan-aw niya sa pagmulay ni Locsin sa aton Vice President, nga maugyunan man sang mga pumuluyo. (w_mateojr@yahoo.com/PN)
