MADAMO sang nagareklamo sa mga pahayag nga ginabungat sang presidente sang pungsod kon magpamulong-pulong siya bisan sa diin man nga okasyon, kag ilabi na kon siya ang natalana nga magapadulong sa iban nga pungsod.
Indi na lipod sa tanan ang ini nga kinaandan nga gawi sang presidente kag dapat indi na matingala ang kadamuan sa mga Filipino, lakip na ang iya mga kritiko nga nagabantay sa tagsa niya ka ginabungat nga mga tinaga.
Sa akon paglantaw, ginahimo lamang ini ni Presidente Rodrigo Duterte agud nga agawon ang atensyon sang tanan padulong sa iya, agud nga matalupangdan ang iya natalana nga pagbiya kag pagpadulong sa iban nga pumgsod, lakip man ang panahon kon sa diin siya ang natalana man nga magaabot na sa pungsod gikan sa iya nga opisyal nga pagbiyahe.
Pinakaulihi nga pahayag sini amo ang natuhoy sa madamo nga kaso sang pagpanghimulos sa syudad sang Davao nga kuno bangud madamo sang maanyag nga babaye rason nga nagaluntad ang insidente. Kahibalo ang tanan nga isa lang ini ka lahog, apang sa mga kritiko nga nabuhi sa sistematiko kag kuno mga matinlo, indi angay nga ibungat ini sang presidente. Madasig nga naghatag sang ila reaksyon ang grupo sang kababaihan, ang sektor nga nagadampig sa kinamatarong sang kababaihan kag gin-updan man sang mga kritiko sang pangulo.
Magluwas sa sini nga pahayag, nagpaandam man siya sa mga negosyante sang bugas nga gamiton niya ang iya gahum agud nga sudlon ang mga bodega nga ginataguan sang bugas sang mga negosyante nga nagatuga sang pagpatimbuok sang presyo sini. Ginbungat sini ang iya kaugot sa mga nagatago sang bugas kag nagatuga sang pagmahal sang presyo sang bugas.
Madamo pa siya sang ginbuy-an nga pahayag antes siya nagpadulong sa pungsod Israel, ulayhon man ang pungsod Jordan.
Ginalantaw naton ang sitwasyon kaangay sang pastor nga nagawali sa dalan kag ang isa ka tawo nga nagawaras sa dalan. Mas madasig kita nga magaktalupangod sa nagawaras kaysa sa nagawali bangud nga ang nagawali ang kinaandan na nga gawi, magawakal sang pulong kag wala man sang tuhay nga ginahimo. Samtang ang nagawaras aton ginabalikid, magluwas sa iya ginawakal, aton man ginabantayan ang iya mga hulag sa kahangawa nga kita ang maulamid ukon masalapay.
Kaangay sini diri ang diskarte sang presidente sa iya nga mga paghulag. Bangud sa kabanihot sang iya sungad, siya ang ginatalupangod sang tanan, lakip na sang iya mga ktitiko. Kag ang iya kabanihot amo man ang nagakuhit sa mga lideres sa iban nga pungsod nga balikdon siya kag hatagan sang atensyon.
Kon indi nangin masabad ang sungad sang presidente, mabudlayan kita sa pagpangayo sang ayudad sa iban nga pungsod, wala sang may magbalikid sa aton kag magtan-ay sang bulig kag magpakig-istorya.
Nakahibalo ang presidente nga kon sa normal kag kinaandan lang nga pagginawi mangin madugay ang aton pagtin-ad kag magapabilin kita nga nakagapos sa mga naglupig sa aton.
Ginahungod ni Presidente Duterte nga magpang-orais agud nga siya ang balikdon, talupangdon, kag hatagan sang bulawanon nga atensyon para sa kaayuhan sang kadamuan nga mga Filipino. (bertladera@gmail.com/PN)
