NAMUTIKAN mo man bala nga kon wala nagapabor sa imo ginalikawan mo?
Madamo sang sitwasyon nga naobserbahan ko nga may kahilabtanan sini sadtong tinalikdan nga paskwa kag pagsug-alaw sang bag-ong tuig.
Kunsabagay, ngaa man abi magsige kita ukot sa mga bagay ukon tawo nga wala man nagakomporme ukon nanamian sa aton. Ngaa magsige kita duso sang aton kaugalingon kon wala sang gana ukon nagalikaw ang natungdan?
Duna sa aton nga mga tawo ang magpalayo sa mga bagay ukon persona nga wala nagabuylog ukon nagaupod sa anuman nga ginahimo naton.
Nagasunggod kita kon indi naton makwa ang aton luyag kwaon.
Kaangay ini sa videoke machine nga nangin bantugon sa panahon sang selebrasyon, ilabi na nga ang halos mga panimalay may yara sang nagatukar nga sonata kag may nagakanta, lakip na ang pag-inom sang makahulubog nga ilimnon.
Isa sa nakita ko nga kon ang nagakanta ginadayaw sang videoke machine nga isa siya ka manami nga umalamba kag ginahatagan sang mataas nga score, ang ini nga nagakanta ang nagapagsik kag nagapalagas pa gid sang pila pa ka mga ambahanon. Bangud nga pabor sa pamuntos, luyag niya nga ipasundayag ang iya abilidad, ginapabugal sini ang mataas nga score.
Apang kon masami nga manubo ang score kag indi manami ang ginahambal sang videoke machine, nagakadulaan sang gana ang umalamba kag mas ginapakamaayo sini nga indi na magpili pa sang masunod nga ambahon bangud masakit pamatian ang manubo nga score.
Ginatandaan sang iban ang brand sang videoke machine kag ginalikawan nila nga magbakal sang kaangay sini bangud nga manubo maghatag sang puntos.
Ginapanilagan naton ang iban nga videoke machine kon maayo magdayaw sa naga-amba. Kon manami maghatag sang score, ginadayaw naton nga kampiyon gid ang videoke. Kon kaisa, ang iban luyag magbakal agud nga may yara siya sang kaugalingon nga videoke machine sa ila puluy-an.
Kaangay man nga sitwasyon sa pulitika, ang mga kilala mo nga may tuhay nga kandidato kaysa sa imo ang nagalikaw ukon nagapalayo sa imo. Bangud ina nga nalas-ay sila nga wala ka nagakomporme sa ila.
Kon makahibalo lang kuntani ang iban mag-apresyar sang kapinasahi sang kada isa. Kon mahangpan lang tani naton ang kinatuhay sang tagsa-tagsa. Kon ginapasangkad lang kuntani naton ang aton panimuot agud nga mas makahangop. Kon himuon naton ini, mas mangin maduagon kag makahulugan ang aton nga pagpangabuhi.
Kahibalo man kita nga luyag sang tawo nga apresyaron, palakpakan, dayawon kag itib-ong ang iya bugal sa halos tanan nga tion.
Apang, indi tanan nga bagay ang magasibu ang resulta sa aton ginalauman. Indi naton makontrol ang mangin reaksyon. Dapat na lang naton nga hangpon nga basi may yara kita sang kakulangan nga kinahanglan pun-an. Basi may mga dapat pa kita nga himuon agud mag-imprubar kag agud mas mapaayo pa gid ang mangin resulta sang aton ginahimo.
Kon kaisa, ang natural nga reaksyon amo nga gilayon nga magdistansya, maglikaw ukon magtahaw. Apang, sa paglipas sang pila ka tion matapos ang ini nga reaksyon, angay nga paminsaron naton kon ano ang masunod nga himuon, kon ano ang dapat nga tadlungon.
Mas makapaayo ini sa aton imbis nga magpadayon lang sa pagpalayo, sa pagpahigad ukon paglikaw. Dapat nga tun-an naton kon ano ang wala nila ginakompormehan agud nga mas maathagan kita kon bagay bala nga mag-adjust kita kag kon makapaayo sa aton kaugalingon ang aton himuon nga adjustment.
Ginhimo ko nga palaanggiran ang videoke machine kag ang tawo bangud nga pareho ang reaksyon nga ila maagom gikan sa tawo nga tuhay ang nabaton nga resulta nga ginalauman gikan sa ila.
Ang akon naobserbahan sadtong panahon sang paskwa kag pagsug-alaw sang bag-ong tuig naghatag sa akon sang ideya tuhoy sa pagsunggod sang tawo. Nagasunggod bangud indi niya mabaton ang paslaw nga resulta sang iya pagpaninguha, ang tuhay nga resulta kaysa sa iya ginalauman.
Kuntani mangin hamtong na ang tanan. Batunon ang mga bagay nga indi maligwat kag pasalamatan ang mga bagay nga natigayon nga maligwat suno sa aton tuyo.
Ang aton pagsunggod nasandig sa aton nga bugal. Bangud luyag naton nga dapat kilalahon kag apresyaron kita sa tanan nga tion kag sitwasyon. Bangud ginakabig naton ang aton kaugalingon nga labaw sa iban kag mas maayo kaysa sa iban. Kon indi naton maagom ang aton ginalauman, nagakarusdak ang aton kusog, nagahuyhoy ang pakpak kag nagasalop agud nga indi matalupangdan kag indi mangin topiko sa mga sugilanon sang iban.
Isa lang ang lyabe diri agud nga indi kita magsunggod. Batunon ang kinatuhay sang kada isa, batunon nga may kahuyang kita, batunon nga may mga tawo nga indi makamutik sa kon ano ang manami sa aton kundi lunsay pakamalaut ukon negatibo lang ang iya matalupangdan.
Ang pagsunggod patimaan nga indi hamtong ang aton panimuot. Angay na ini nga ligwaton. Dapat nga pabakuron ang paminsaron kag emosyon. (bertladera@gmail.com/PN)
