INDI TA MAN seguro mabasol gid si President Rodrigo Duterte sa iya kalain buot sa Simbahan Katolika – kag sa iban pa nga kritiko – sa sige sini nga pag-kritikar sa Presidente sa padayon nga pinatyanay sa pungsod angot sa Gyera Kontra Droga.
In fact, halin sang pagpungko sa pwesto ni Presidente sadtong 2016 sobra 4,000 na ang napatay, sunu sa kapulisan, sa ila “police operations”. Nagbato kuno ini sila sang dakpon na sang mga pulis.
Malapit man ugaling sa amo nga kadamuon ang napatay tungod sa extrajudicial killings (EJK), sunu sa human rights groups, nga tani gindakop lang kag pasakaan kaso.
Ang Gyera Kontra Droga ginpangako ini ni Presidente sa kampanya sa eleksyon sang 2016, kag isa ini sa ka daku nga rason kon ngaa nagdaug siya sa eleksyon. Gani, natural lang nga ipatuman niya ini sa iya masarangan.
Pareho may interes ang Estado kag Simbahan sa sining problema sa droga. Kon may problema sa ila tunga, ina yara lang sa punto de vista sa pagpatuman.
Sa nahibal-an ta na, ginapabalik ni Presidente ang death penalty, ukon ang silot nga kamatayon, sa mabug-at gid kaayo nga mga kaso, lakip ang dalagku nga mga kaso angot sa ilegal nga droga, samtang sige man ang pinatyanay.
On the other hand, kontra ini sang Simbahan Katolika, nga ginatuohan sang sobra 80 ka porsyento sang aton populasyon, sa idalom sang ika-5 nga Sugo sang Diyos: Indi ka magpatay (sang kapareho mo).
Sugot lang ang Simbahan sa self-defense, ukon sa pag-defensa sa kaugalingon, kag kaangay nga defensa lakip ang “just war”, ukon ang matarong nga pagsulod sa gyera nga indi na malikawan.
Kumpormi man sini si Presidente, sa iya mismo siling. Ang problema ugaling, sunu sa mga tagpangapin sang Simbahan kag human rights groups, kay lain ang sugid sa hulid.
Sa iya mga deklarasyon, siling nila, ginapaisug pa ni Presidente ang mga pulis sa paghimo sang kalakasan paagi sa pagpasalig sa ila sang iya pag-apin sa ila sa kon ano man nga salabton. “Ako ang mapa-priso kon matabo!” nasiling gani niya. Tungod sini, indi man katingalahan nga ang iban nga pulis gatirada na gid lang sang ila personal nga ginakaakigan.
Well, may ara nga mapatihan, may ara nga indi mapatihan sa sining mga “police operations” kag akusasyon sing EJK. Tubtub subong ugaling, wala pa gid sing may nadutlan sing kaso, luas lang sa tatlo ka pulis nga ginbangdan sang kamatayon sang isa ka menor de edad sa Metro Manila.
Kon kis-a, kon ano-ano man ang ginahambal sang Presidente nga makasalaklaw, ukon indi maayo pamatian sang mga kabataan sa ila dapat ginataha tani nga pangulo sang pungsod.
Maabtik man ugaling magpangapin ang mga tagpamababa sang Presidente. Masiling ina sila nga “indi ina ang buot silingon sang Presidente.”
Kon kis-a, masiling pa ina sila nga “joke” (lahog) ukon “hyberbole” (lapaw nga sugid) lang ang mga ini.
Apang masakit ini sa mga natungdan, katulad sang lahog parti sa ginlugos nga Australyano nga madre.
Kon kis-a gani makahaladlok. Sa kaakig sang Presidente nabungat gani niya nga patyon niya ang mga Obispo kay wala man sila sing nahimo kundi ang mag-kritikar sa Presidente.
Indi ugaling kuno ina ang luyag ipahangop sang Presidente kay indi siya kuno makapatay sang obispo, siling sang iya mga tagpamababa.
Tungod sini, madamo gani sang mga tumuluo ang hayag nga nagpabatyag sang ila kalain buot sa sining pang-atake ni Presidente sa mga pari.
In fact, nagpakita sing suporta ang mga tumuluo sa ila mga obispo sa misa sa pagdedicar sa altar sang Manila Cathedral sadtong ika-60 nga postwar restoration rite sini sadtong Disyembre 10, nga gintambungan sang mga 20 ka obispo.
Sa ini nga okasyon, gintagaan sang 30 minutos nga palakpak (applause) sang mga tumuluo ang mga obispo sa pagpakita sang ila suporta sa ila sa sining pamahog ni Presidente nga dapat sila patyon.
Nanawagan man gani ang Presidente nga maayo pa nga indi na gid lang magtambong sa misa ang mga pumuluyo kag mangadi na gid lang sa ila mga puluy-an. Apang wala ini ginsunod sang mga tumuluo.
Sa Mandurriao Parish Church, nagdamo pa gani ang nagsimba diri sadtong Domingo sang aga. (w_mateojr@yahoo.com/PN)
