NAGASUGOD na ang mga kandidato sa paghimulso sa mga pumuluyo kon bala mamag-an man ang ila nga personalidad sa mga botante, kon bala may posibilidad man nga malakip sila sa mangin honorable nga mga opisyal sang goberyno sang syudad.
Masaku na ang paglagaw-lagaw sang iban sa ila, masami na nga nagapakita kag nagapangamusta sa mga pumuluyo kag ginahibalo ang ila kahimtangan, kon kumusta ang ila pagsinarayo. Nagapabatyag sila sa pumuluyo nga yara sila nga handa magserbisyo. Ginapabatyag nila sa pumuluyo ang ila presensya kag masarangan nga himuon sa pagpanghimanwa.
LAWAG SANG NGALAN SA KAHANGINAN
Nagasugod naman ang radyo sa paglibot sa kabug-usan sang syudad agud nga pulsuhan ang pumuluyo. Bitbit nila ang papel sang mga potensyal nga mga kandidato kag ginatakus ang pumuluyo kon may mga ngalan nga nagalagting sa ila dulunggan kag kon may yara sa pwesto nga ila na ginakaugtan nga wala man sang may hinimuan samtang nagapangalagad.
May mga kandidato nga nagabayad agud nga ipatigayon nga malakip ang iya ngalan sa survey kag may yara sang kandidato nga sila mismo ang nagapa-survey. Luyag nila hibaluon ang ila kusog kag kon sin-o nga mga kandidato ang may pwersa kag kon sin-o naman ang wala sang tsansa.
Kalakip sa sini nga survey ang paglawag sa ila nga ngalan sa kahanginan sa tion nga may nagagwa na nga resulta.
PAGKONDISYON SA PAMINSARON
Isa ka katuyuan sang survey amo nga ikondisyon ang paminsaron sang pumuluyo kon sin-o nga kandidato ang manugdaug kag kon sin-o ang wigit. Bisan pa nga sa matuod nga resulta wala siya sang tsansa apang bangud nga nagbayad siya, ang iya ngalan ang ginadugangan sang puntos agud nga magpanguna sa iban nga kasumpong. Ginakondisyon ang mga botante nga siya ang manugdaug kag sa matag-adlaw ang iya ngalan ginalawag nga nagadugang sa iya pagka-popular.
TARGET SANG DEMOLISYON
Ang negatibo nga epekto amo nga ang kandidato nga nagapanguna sa survey amo ang target sang demolisyon sang iya mga kaksumpong. Siya ang pangitaan sang isyu, siya ang habuyan sang lunang, kag sa ulihi siya ang magabatyag kag mawigit sa listahan.
GALAMITON SA PAG-INTO SANG MAY MALAIN NGA BUKHO
Sa nasiling ko na, ang survey isa ka pagtakus sa kusog sang pulitiko, paghibalo sa huyog sang mga pumuluyo, pagkwa sang impormasyon agud nga mapapag-on ang mahuyang kag rumpagon ang mabakod.
Ang masum-od lamang sang sini nga lihok amo nga ang iban ginagamit nila ang survey kag ang pagpatigayon sang pagpa-survey agud nga intoon ang pulitiko, hatagan sang maayo nga resulta kag papatihon nga mabakod ang iya tindog batok sa iya mga kasumpong. Ginahimo ini sang mga sakon nga luyag makaagom sang kwarta. Ginahimo ini sang mga daluk kag may malaut nga panimuot.
DAPAT MAGHALONG SA KULAS-DAYAW
Indi tanan nga dayaw seryoso kag sensiro. May mga dayaw nga pakulahaw kag luyag lang nga magpamentaha. Indi man gilayon nga magpadala-dala sa ginasuhestyon sang mga manugmanipular. Indi gid magsaot sa palad sang mga bentahuso.
Nagahilapit na ang panahon sang eleksyon kag lauman nga magadata pa ang survey sa kandidatura. (bertladera@gmail.com/PN)
