Kasan-o lang nangin apolitical ang hulag sang politiko?
Kun hambalon nga ang hulag pamolitika lamang, isa ina ka insult sa politiko.
Halimbawa lamang diri ang ginahimo karon nga konsultasyon sang syudad sang Iloilo para sa pagbuhi sang Iloilo Central Market.
Ang mga kritiko ni Mayor Jose Espinosa III nagaakusar sa alkalde sang pamulitika. Ang iya plano nga pag-redevelop sang merkado pakagat lang sa mga botante agud suportahan sya sa 2019 elections.
Siling sang mga kaumpong sang alkalde pamolitika lang ina. Ngaa subong lang sya naghulag?
Samtang si Cong. Jerry Treñas may iya man bersyon sang pagkaayo sang merkado sang syudad. Pabugal niya sa pila lang ka milyon, may multipurpose building na ang merkado. Kaangay sang sa Tyenda La Paz nga gym ang porma sang istruktura. Kun mag-ulan basa ang mga negosyante.
Ginapaanggid ini sang iya mga suporters sa plano ni Espinosa nga sa gamay nga budget, makaayo ang merkado.
Kun kamo ang pamangkuton, indi ini pamulitika? Ngaa subong lang niya ini ginhimo? Syam man ka tuig nga alkalde sya sang syudad ano ang nahimo nya sa merkado?
Ang hulag ni Treñas sa merkado maathag man nga pamolitika kay pakagat man ina sa mga vendors agud botohon sya.
Sa madali nga pulong, indi makaakusar ang isa ka politiko sa hulag sang iya kasumpong nga pamolitika kay sya guilty man sa sini nga hulag. Indi makasiling ang isa ka politiko nga wala sya nagapamulitika.
Ang rigodon sa Iloilo Provincial Board kag city council maathag man nga politika ang rason. Indi makasiling ang mga sa likod sang hulag nga ini para sa kaayuhan sang kaban sang gobyerno kay sang una isa man lang ang ila tono.
Kita nga mga botante indi na magpadala sa pagkaipokrito sang mga politiko. Buligay kita sa pag-edukar sang tagsa-tagsa sang kagarukan ukon kaayuhan sang gusto magpanibersyo sa atun gobyerno.
Tandaan nga ang politiko nagapamolitika gid na!/PN
