MABUDLAY gid nga mapasunod ang mga tawo subong sa mga pagsulondan nga ginapatuman samtang ara kita sa quarantine.
Sadto sang ara pa kita sa General Community Quarantine (GCQ), bisan nga may liquor ban madamo sa gihapon ang nagapahubog. Bisan may curfew, maisog gihapon mag gwa sa ila balay bisan ti-on na sang curfew. Indi gani makasoksok sang masks kag wala man nagatuman sang social distancing.
Apang ngaa bala nga wala nagatuman ang iban nga tawo?
Mahimo ang iban dungol gid man kag naanad na sa ila daan nga pagsinalayo gani daw indi makasaho sa paghugot nga ginapatuman.
Sang Byernes, nagdeploy ang syudad sang 200 ka compliance officers agud magpatuman sang social distancing kag hugot nga pagsulondan sa pag gamit sang mask. Sila ang magapangsita kag magapahanumdom sa mga violators nga dapat mag mask kag may social distancing.
Matapos ang masangkad nga pagpahibalo sa publiko, sugoran man ang pagmulta sang tag-P500 sa tagsa ka magalapas. Kun handum ta nga makalikaw sa virus, kuntani indi na kinahanglan nga may manugsaway pa sa atun.
Subong nga ara na kita sa modified enhanced community quarantine, ang pagsoksok sang mask kag social distancing hugot gihapon nga ipatuman.
Tandaan natun nga ang pagpahalog sang quarantine classification sa atun lugar wala nagakahulugan nga hilway na kita sa COVID-19. Ini nga sakit ara lang sa palibot bangud ang virus indi natun makita. Amo ina nga ginsiling nga ara na kita sa “new normal.”
“New normal” bangud nga kun sang una daw sa wala lang ang personal nga katinlo, subong dapat mangin doble na. Kinahanglan na nga manghinaw sang masami. Magpabakod sang immune system paagi sa matinlo nga lifestyle.
Nagbag-o gid ang atun pagginawi. Tani ang atun pagbinatasan magbag-o man para sa kaayuhan. Makatuon na kita mag-amlig sang palibot. Indi lang katinlo pisikal kundi katinlo sang pangkabilugan ang atun tan-awon kag himuon.
Mabudlay batu-an ang indi makita nga kasumpong bangud salawayon man kita tanan. Indi makatuman sa simple nga pagsulondan.
Tani ang pagkamahinalungon makalalaton man agud malatnan sang maayo nga pagginawi ang mga salawayon! (jpranco1975@gmail.com/PN)
