GINABALIKID lang ang kabangdanan kon nagagutok kag indi mahinay ang lakat sang mga salakyan sa dalanon sang syudad. Ginalantaw kon ano ang rason kon ngaa nagagutok, ginahimutaran ang sitwasyon kon bala hugot nga ginapatuman ang mga ordinansa.
Nagbayluhanay na sang pahayag si Jeck Conlu ang tagpamuno sang Public Safety and Transportation Management Office kag si City Administrator Atty. Hernando Galvez angot sa truck ban ordinance kag sa anti-barker ordinance sang syudad.
Gintalakay na naton sang tinalikdan ang tuhoy sa anti-barker ordinance. Karon aton naman hatagan sang importansya ang truck ban ordinance sang syudad.
Sadtong tuig 2002 ginpasar ang Regulation Ordinance No. 2002-246 kag paglipas sang pito ka tuig may bahin diri nga gin-amendaran paagi sa Regulation Ordinance No. 2009-342 nga ginpasar sadtong Oktubre 28, 2009.
Ginligwat ang pila ka bahin sang ordinansa agud nga hatagan sang maathag nga kahulugan kag kalro man nga giya kon paano ipatuman ang ordinansa.
Nasaad sa Section 3 sang Regulation Ordinance No. 2009-342 nga ang small truck amo ang 8’ x 20’ ukon kabus pa nga kadakuon sang trak kag dapat nga tapikan ini sang ‘yellow colored stickers’ kag ang medium truck amo ang 8’ x 21’ tubtub 8’ x 24’ nga kadakuon sang trak kag dapat tapikan sang ‘green colored stickers’ kag ang big truck amo ang 8’ x 25’ ukon labaw pa nga kadakuon sang trak kag dapat tapikan sang ‘red colored stickers.’
Gin-athag man sang ordinansa nga ang tugutan lang nga trak amo ang mini-lorry ukon small-tank truck nga nagasangkad sang mas o menos sa anum ka tapak kag 18 ka tapak ukon kabus nga kalabaon nga nagakarga lang sang kurudo.
Nasaad man sa ordinansa nga ang Iloilo City Government dapat magahatag sang Truck Ban Stickers kag ang katungdanan sang TMEU (antes pa natukod ang TMTRO sa idalom sang karon nga PSTMO) amo ang maghiwat sang pagtakus agud madeterminar ang husto nga kadakuon sang trak.
Isa lang ang ginapanugyan ni City Administrator Atty. Hernando Galvez sa PSTMO nga ipatuman sang hugot ang ordinansa, madugay na nga ordinansa, agud nga magtawhay ang dalanon, antes magtan-ay sang iban pa nga solusyon nga posible makapakumplikar sa sitwasyon.
Nagsabat naman si PSTMO head Jeck Conlu nga hugot nila nga ginapatuman ang ordinansa tuhoy sa trapiko.
Apang aton lantawon, may yara bala sang nagatapik nga sticker sa mga trak? Madamo sang trak ang nagataris sa dalanon sang syudad apang wala sang bisan isa ka sticker kita nga nakita. Dapat unahon ini nga solusyunan antes magdiskurso sa iban nga palaligban.
Madamo sang nasaad sa ordinansa nga dapat ipatuman agud nga magtawhay ang dalan, madamo sang ordinansa para sa pagpasulhay sa dalan kag isa lang ang truck ban ordinance nga aton karon ginatutukan.
Dapat liwat nga tun-an kag ipahangop sa mga traffic enforcer ang kaundan sang ordinance bangud madamo sang trak ang nagarondalya sa dalanon sang syudad, madamo sang kargamento kag produkto nga ginapasulod.
Ang truck ban ordinance dapat tun-an kag hugot liwat nga ipatuman. (bertladera@gmail.com/PN)
