(Continued from July 30, 2018)
MAY NAKILALA man ako nga driver. Perceptive. Kon sa terminolohiya pa sang mga milennial, “advance mag-isip.”
“Sige ‘ya ang hulog ko sa SSS, Day. Para sa panahon nga indi na ako maka-drive sang salakyan, may pension ako nga batuon.”
Ginatumod niya ang iya bulanan nga voluntary contribution sa Social Security System” para nakaseguro siya nga may malauman nga pension makaligad nga iya makompleto ang iya kontribusyon.
Maayo guid kon mabalikid siya sang iya kabataan, pero labing maayo nga may iya man siya nga kuarta sa iya pagtigulang.
Ang nasambit nga pagpati may kahilabtanan sa tuyo sang SSS nga wala sang trabahanteng Filipino nga mawigit sa tabtaban. Nagakaangay sa ila ang makahulugan nga safety net sang social security system nga magasalo sa iya pananglit maalang-alangan.
***
Ginakulang na gid man bala ang depasahero nga salakyan? Ini ang palamangkutanon sang madamo nga mga pasahero nga nagakaalangan sa dalan.
Mabudlay ang makasakay sa jeep kon aga. Madugay na ang paghulat sang salakyan, madamo pa nga pasahero ang nagainagaway.
Ang las 7 sa aga nga scenario sa Tabuc Suba sa Jaro kag sa bisan diin lang nga terminal sang salakyan daw kasubong sang nagapinaindisanay sa pagsakay.
Ang mga distrito sang Jaro, Mandurriao kag Arevalo kag ang kaingud nga kabanwahanan sa Iloilo amo na karon ang fast-growing residential districts. Natural lang nga madamo ang pumuluyo nga may need nga makasakay sa jeep padulong sa ila eskuelahan o ulubrahan.
Nagapangabay kita sa mga drivers association sa pagseguro nga madamo nga salakayan ang ila ma-field agud mapangalagaran ang mga sumalakay.
Madamo nga mga pasahero ang nagakaatrasar sa ila padulungan bangud sang kawala o kakulang sang salakyan.
May mga pila pa ka tsuper nga ginapakamaayo pa magpamahaw (breakfast) una samtang ang mga pasahero nagahulat sa ila.
Ang trabaho sang tsuper indi 8 a.m. to 12 noon kag 1 p.m. to 5 p.m. Nagakadapat nga antes las 7 sa aga ara na sila sa pag-pick up sang mga pasahero. Pangalagaran nila dapat ang mga pasahero labi na kon kagab-ihon bangud las sinco sa hapon amo pa lang ang pagginuwa sang mga estudyante gikan sa ila mga eskuelahan, amo man ang mga empleyado nga naghalin sa ila mga opisina.
Ang buhay tsuper indi hamak nga hangkat. Service-oriented dapat. Alagaran ang mga needs sang mga pasahero. Nagapangabay kita sa ila nga atubangon ang madamo nga pasahero nga kinahanglan makatemprano. Nagapangabay man kita nga ulikdon ang mga pasahero nga kinahanglan makapauli sang safe sa gab-i nga indi maalangan sa dalan. (runjirjamolo@gmail.com/PN)
