NAGLABAY na ang unos apang may yara sa gihapon sang grupo nga indi mahim-os. Nagahulat sa mangin panindugan, desisyon nga ila ginalauman.
Apang tubtub sa karon, kaangay sang lubog nga tubig nga nagadaludo kag nagaalwak sa makitid nga suba, maiwat ang higayon nga makita ang bato sa idalom ukon matungkad ang kadalumon.
Tubtub sa karon wala pa sang masanag nga patimaan kon ano ang mangin desisyon ni Mayor Jose Espinosa III sa iya nga kandidatura. Indi mabasa kon bala matukod siya sang iya kaugalingon nga grupo ukon bala magapakig-alyansa siya sa mga oposisyon agud nga bungguon ang iya nga bilas nga si Congressman Jerry Treñas.
Samtang nagahulat sila sa kay Espinosa, masaku naman si Treñas sa pagpapag-on sang iya nga grupo. Masami sila nga nagakonsulta, nagabisita, kag nagapabakod sang ila kaantanan sa mga mga tagsakdag.
Padayon man ang pagpangganyat ni Espinosa sa mga pumuluyo sa syudad paagi sa iya mga programa kag proyekto nga ginadul-ong mismo sa ugsaran sang mga pumuluyo.
Magluwas sini, sige man ang iya nga pagpakig-istorya sa mga opisyales sang barangay, mga naga-upod sa iya kag sa mga naga-upod naman sa bilas niya, paagi sa pagsiling nga malayo pa ang pulitika.
Matuod nga makanay ang hulag ni Espinosa sa mata sang iya kasumpong apang ang iya mga pagpabatyag nagapalanuhot sa dughan kag panimuot sang mga pumuluyo kag mga opisyales nga naga-upod sa iya kag wala sa linyada sang iya bilas.
Nagsiling ako sa una naton nga panugdaon nga kaangay sang isa ka lambat, halos nasikpaw na nila ang mga opisyales sa barangay nga ang indi kay Espinosa, yara kay Treñas kag ang magasumpong sa ila ang wala na sang makinhas.
Kon lubos pa gid nga padalman, may mga wasi sa mga pumuluyo kag sila ang nasikpaw paagi naman sa programa ni Espinosa sa tagsa ka barangay. Nagakahulugan ini nga ang primera klase nga botante, kag ang mga sapsap nga botante ang halos nasulod na sa lambat sang panghimanwa.
Pila pa ka pagpalawig sang iskedyul sang filing sang certificate of candidacy ang aton hulaton agud nga makabungat si Espinosa sang iya nga mangin grupo para sa eleksyon?
Indi ayhan taktika sa pagpaiway ang iya ginahimo agud nga indi makahulag ang nagahulat sa iya samtang siya ang nagapangsikpaw na sa panong sang mga botante?
May hurubaton nga nagasiling, “The agony of waiting is more painful that the agony itself.” Basi mabilin sa tabtaban ang nagahulat kag malayo na ang nalab-ot sang iya ginahulat? Ukon basi wala na sang hulaton pa ang nagahulat?
Ang tawo nga desidido kag may mapag-on nga panindugan ang wala na nagapabugit-bugit pa sa paghimo sang desisyon. Kon may huyog siya nga mag-upod sa oposisyon, dapat sadto pa siya nagdesisyon.
Ang ila nga sumpakilay paagi lamang agud nga maghawan ang lugar kag lantawon ang ila pag-iskrema kag matumod kon sin-o ang dampig sang kada isa.
Mabudlay magsimbog ang tubig kag ang langis, kag mas matimbang ang dugo nga nagapanalaytay sa kaugatan sang magbilas./PN
