TUDOK sa tul-an…ini ang ginagamit sang mga katigulangan agud ilaragway angh sobra-sobra nga kalian nga pagbinatasan, balatyagon ukon ano pa nga gusto hatagan sang sobra-sobra (excessive ) nga bug-at.
Apang subong nga higayun, pahanugoti ako sa paggamit sini nga tinaga agud ilaragway ang mangin sitwasyon sang election subong diri sa syudad kag probinsya sang Iloilo.
Ang subong nga eleksyon makabig nga pinakapait nga klase sa maragtas sang Iloilo. Ngaa man?
Diri sa syudad sang Iloilo ang makabig mapait nga natabu sa maragtas sang election amo ang pagbiya ni Cong. Jerry Treñas kay anay Justice secretary Raul Gonzalez Sr. kag nagpadalagan bilang kongresista kontra sa anak nga si Raul Jr.
Masakit sa bahin sang mga Gonzalez kay sila ang nagpabangon sang napatay na nga political career ni Treñas nga gindugangan pa sang ginbunggo niya ang iya anay amay sa politika. Banghud sini siling nila, tudok gid sa tul-an ang kaakig sa iya sang mga Gonzalez.
Pero husto man ang nangin tikang ni Treñas. Wala man sang monopoliya sang pamolitika sa syudad, indi bala?
Wala man nagsala ang mga Ilonggo sa pagboto kay Treñas bangud sa iya nag-umpisa ang pagsanyog sang syudad sang Iloilo kun ano na ini subong.
Pagpungko ni Treñas sya naman ang nagbulos bilang “Political Patriarch” sa syudad sang Iloilo. Bangud sa iya nangin mahapos ang kadalag-an sang ila mga kaalyado, ilabi na sang iya bilas nga karon si Mayor Jose Espinosa III sa pagkabise alkalde sang una.
Pero kun sa madumduman ko, nagkonsehal man si Espinosa sang una. Sa pagtapos sang term sang iya bilas kag ni anay mayor Jed Patrick Mabilog, ginalauman na nga si Joe III ang masunod nga alkalde sang syudad sa isa ka election. Apang bangud sang mapait nga kapalaran, nagbag-o ang political landscape sa syudad kag nagsunod man sa pagbag-o ang desisyon ni Treñas. Gikan sa retirement sa politika, nag-announce si Treñas nga magapadalagan sya sa pagkaalkalde kag gusto itib-ong si Espinosa nga mangin kongresista.
Wala gid naglaum ang tanan nga supakon ni Espinosa ang gusto sang bilas. Nagdesisyon sya nga magpadalagan sa pagkaalkalde. Diri naman nagsugod ang mapait nga habuyanay sang lunang sang magbilas.
Ang pamangkot, may poder bala si Treñas nga hambalan si Joe III kun ano ang pwesto? Wala man, indi bala?
Bangud sini, tudok sa tul-an ang away sang magbilas. Paano na lang kun matapos ang election? Magapabilin nga nakatudok sa ila balatyagon ang ila mapait nga sumpunganay sa election.
Amo man ini ang nagakatabu subong sa probinsya sang Iloilo. Sa pila ka adlaw kun magsumalangay sila ano ayhan ang ila mangin reaction? Paano ayhan panason ang tudok sa tul-an nga opensiba nga ginahaboy sa isa kag isa? (jpranco1975@gmail.com/PN)
