ANG MGA manunudlo isa sa makabig nga dalayawon nga propesyon. Daw sa ano bala nga ikaw ang nagapaalam sa mga kabataan sang iban.
Ang pagtudlo sa kabataan dako gid nga panghangkat kapin pa kun kulang ka sa kagamitan. Pero mas labaw pa gid nga panghangkat kun ikaw isa ka manunudlo sa mga nabukid nga bahin sang atun pungsod. Mga eskwelahan nga kun kulang lang ang kataampad kag pagpalangga sa trabaho sang isa ka titser sigurado nga talikdan niya ang propesyon.
Sa banwa sang Calinog, Iloilo madamo sang mga eskwelahan sa nabukid nga bahin sang banwa. Ang iban nga mga eskwelahan ara na nahamtang sa dulonan sang mga bawa sang Tapaz sa Capiz; Libacao sa Aklan kag San Remigio sa Antique.
Ang Supanga Elementary School sa Barangay Supanga, Calinog, Iloilo isa lang sa mga nabukid nga eskwelahan sang banwa. Ini nagaserbe sa mga barangays sang Calinog nga ara sa ibabaw sang bukid agud indi na magpanaog pa sa balod ang mga kabataan para lang makaeskwela. Ang mga estudyante diri lunsay mga katapo sang Panay Bukidnon nga komunidad.
Luyag ko lang hatagan sang higayun ang tula kag panalambiton sang isa ka manunudlo sang sini nga eskwelahan.
Hugot sang Manunudlo: Bakasyon Tapos Don
Himu ni Queennie Mae Calvo Carado
Teacher 1, Supanga Elementary School
Schools District of Calinog II
Buwas tapos na ang bakasyon,
Ay abaw! Daw kasan-o lang tapus don.
Wala tuo abi ang mga okasyon,
Wala pa natunaw ang kinaon nga lechon.
Huo, balik sang mga manunudlo,
Pati tanan nga mga bumulutho.
Kabay pa wala nila malipatan,
Ang ABC kag 123 nila nga natun-an.
Pasalamatan man dapat naton,
May Enero 2 nga extensyon ka bakasyon.
Tapuson na natun tanan nga ulubrahun,
Kay sa Huwebes, Enero 3 may klase dun.
Indi mapunggan ang akun nga balatyagon,
Kay gahulat sa bukid estudyante nakun.
Itudlo bag-o nga mga leksyon kag impormasyon,
Kay panudlo daan ang aton nga propesyon./PN
