NANGILAT kag nagpanaguob sang nagligad nga flag ceremony sang Iloilo City Government. Ini matapos ginpangsukmatan ni Mayor Jerry Treñas ang mga department heads nga ginapatihan niya nagkulang sa ila katungdanan gani wala nahatag ang nagakadapat nga serbisyo sa pumuluyo sang syudad.
Ang natabu ginturasok sila ni Mayor Treñas bangud wala nagustuhan sang alkalde ang iya nabaton nga balita nga may kapatumbayaan ang mga ini gani nagakaguba ang imahen sang syudad sang Iloilo.
Ginreklamo sang alkalde ang kapaslawan sang City Zoning Board nga magrekumendar sang reclassification sang mga duta sa syudad. Paathag sang alkalde, may mga lugar nga residential pa ang classification apisar nga madamo na sang nagatilindog nga negosyo. Ang zoning officer sang syudad amo si Architect Dolly Zuluaga…ayhan madumduman nyo pa ang iya ngalan.
Ang City Engineer’s Office mahinay man sa ila paghatag sang building kag occupancy permits. Ang ila head dira antes magsulod si Treñas amo si Engineer Roberto Divinagracia.
Kag huo gale, dugang na lang da sa isyu…may hotel investor man nga nagreklamo kay ginaalegar ginpangayuan kuno sang P300,000 apang naayuan, nahimo nga P120,000. Base pwede madala sa imbestigasyon kay daw may angut kuno sa kuryente?
Ang Local Civil Registrar ginapamunuan ni Juncae Manikan. Ginasiling nga may pasaburnohanay sang P8,000 para makakuha sang marriage license. Pero sin-o bala ang in-charge sa tree planting? Mamangkot kita abi sa in-charge sang Calajunan dumpsite nga amo ang lugar sang tree planting kag amo ang nagahatag sang certificate.
Kumusta naman ang City Population Office nga amo ang naga-conduct sang seminar sa mga manugpakasal?
Ginturasok man si Gene Garingalao, ang head sang City Social Welfare and Development Office bangud indi niya pagbuy-an ang financial assistance nga gusto sang alkalde ipaidalum sa Office of the Mayor. May mga obserbasyon ang Commission on Audit nga may problema sa pagpanagtag.
Ay huo gale, kumusta ang P25,000 nga nakita sa spot audit nga nadispalko sang isa ka empliyado? Ginpabayran lang sa iya kag wala na ginkasuhan?
May duha pa ka department heads nga ginturasok man bangud sang isyu sang korapsyon…siling sa ila, kawatan kamo da sa____…ikaw kawatan ka man sa______!!!
Sabat sang isa…”Indi ko ya makawat.”
Tunto nga pisô ni, asta subong wala natubuan sang kuyos.
Sa natabu sa nakaligad nga flag ceremony, sigurado nga matihin na ang nagapamentaha sa ila opisina. Bangud kun indi, sila ang masunod nga turasukon!
Maayo man ini nga pamaagi ni Treñas bangud sigurado maminsar sang makapila ka beses ang sin-o man antes maghimo sang katuntohan ilabi na ang sa pihak nga kudal sang kahari-an.
Pero siling sang isa nga nagakumod-kumod, “Saramaha sila, puti, blue, pula ukon rainbow man ang ila kolor.”/PN
