LUYAG naton nga masami magapanguna sa anuman na nga bagay ukon sa kompetisyon. Luyag naton nga masami damo sang nagasakdag sa aton hilikuton ukon nagakomporme sa aton mga akto. Luyag naton nga magdaku ang aton nga kita sa aton palangabuhian.
Sin-o bala ang indi malipay kon magpanguna sa imo kasumpong? Manami batyagon nga yara ikaw sa ibabaw, labaw sa imo mga kasumpong kag nagaani sang dagaya nga dungog kag benepisyo bangud sa mga nahimo nga sakripisyo. Ginhimakasan ang tanan, ginhatag ang halos bug-os nga tion kag kusog agud nga magmadinalag-on.
Kaangay man sa kadamuon sang ‘like’ ukon ‘share’ sa facebook account, luyag naton nga masami madamo ang naga-‘click’ diri nga nagapatimaan nga madamo sang nagakomporme, madamo sang nanamian, madamo sang nagasakdag sa aton hilikuton kag ang balik sini sa aton kaugalingon amo ang kalipay, luyag naton nga mangin malipayon paagi sa maagom nga kadamuon sang ‘like’ kag ‘share’ kag ini ang produkto sang aton paghimakas.
Indi lamang ini nga bagay ang aton ginahimakasan, lakip na diri ang aton kita sa aton palangabuhian. Kon sang una, nagamantenir kita sang ‘4-digit’ income, karon luya naton sang ‘5-digit’ kag kon mahimo pa lang ang ‘6-digit’ ukon labaw pa nga kadakuon sang kita agud nga mas mangin malipayon kita sa aton paghimakas.
Masiling naton nga mas nalipay kita kon mas malabawan naton ang nauna naton nga kahimtangan, ukon samtang nagataas ang numero. Kag samtang, nagataas ang numero padayon man ang aton paghimakas nga mas malabawan pa gid ini tubtub nga nangin ‘cycle’ na sang aton pagsinarayo nga magtalana sang target kag lab-uton kag pagkatapos labawan kag liwat naman nga pataasan.
Sa sini nga sitwasyon, kon aton lantawon daw natural lamang bangud ini ang pokus sang aton paminsaron kag pokus man sang aton matag-adlaw nga pagpangabudlay.
Nalipat kita nga nagalipas ang panahon, nagakabus ang aton kusog, nagaluya ang aton panimuot kag ang target daw indi na malab-ot.
Gintagna naton sa mataas kag kita man ang nagapangabudlay sa pagtaklas. Gintungtong naton sa ibabaw kag kita man ang nagapangabudlay sa paglab-ot.
Matuod nga tawo nagapangabudlay sa kon ano ang sa iya makapahalipay. Wala sang may makasapar sa iya paghimakas kag ang magasumalang, sa iya magabatas.
Sa bisan diin man nga patag sang pangabuhi, ano man nga sahi sang hilikuton, napatudok na sa aton nga dapat magpanguna, dapat maglabaw, dapat nga madamo, agud makabig nga madinalag-on.
Pwede mo ayhan nga mabuhina ang imo kalipayan? Pwede mo ayhan nga panubuan ang numero nga nagapahalipay sa imo?
Sa nasiling na, ang kalipayan wala nasandig sa kadamuon sang ’like’ ukon ‘share’ ukon sa pagpanguna, ukon sa padamo-damo. Ang kalipayan nasandig sa kon paano mo maapresyar ang gamay nga bagay, ang paghatag sang balor sa gamay nga butang agud nga mangin daku ang importansya sa imo kabuhi.
Ikaw ang nagahatag sang balor sa tanan nga bagay.
Untatan na naton ang magpaulipon sa numero./PN
