NAGAKINAHANGLAN na ayhan sang pustiso ang syudad? Pustiso para sa Office of the Building Official (OBO) agud makapangagat sang balingag nga mga kontraktors kag tag-iya sang mga buildings?
Sining karon lang nangin isyu ang duha ka insidente sa isa ka bag-o nga building sa Barangay Bolilao, Mandurriao nga una nagbiktima sa minor de edad nga barker kag duha ka salakyan nga nahulugan sang tinipik sang kristal sa ila windshields. Sa una nga insidente, ngaa wala na ginpauntat ang ila construction? Ngaa ginpadayun pa gid?
Paathag ni City Engineer Roberto Divinagracia, wala sila sang nakita nga violation sa natabu. Ginakabig nila nga aksidente lamang ang natabu gani wala sang salabton ang contractor kag building. Sa pagkamatuod nagsalig sila sa pasalig sang contractor nga magahimo sang safety nets agud indi na masulit ang insidente.
Pero ano ang natabu? Nasulit naman ang insidente apang sa gihapon hambal ni Divinagracia wala violation kay aksidente lang. Hay, nano man?
Abril 17, nagpaggwa sang work stoppage order si Divinagracia. Ini matapos ang ikaduha nga aksidente.
Sa una pa lang, nagrekumendar na sang closure kag work stoppage si Mr. Jeck Conlu sang Public Safety and Transportation Management Office (PSTMO) pero wala dayun gin-aktuhan sang opisina ni Mayor Jose Espinosa III.
Ngaa bala nga nagapanalaw ang OBO nga magpauntat sang obra sa una pa lang nga insidente? Kag ngaa nga ginhatagan pa ang building sang partial occupancy permit? Nag-inspect gid man ang OBO antes naghatag sini? Ukon base nagapabulagbulag sila sa matuod nga sitwasyon?
Sa madamo na nga mga insidente diri sa syudad, wala gid sang ngipon ang atun gobyerno. Ano ang ila ginhimo sa natabu sang 2015 sa isa ka mall sa Jaro nga sang gina-construct, nagharupaas ang crane? Kumusta naman natabu sa construction site sang GBPC?
Ini tanan nga mga insidente, halos wala sang nahimo ang syudad. Wala sang sanctions nga ginpapanaog ang syudad sa pihak sang mga paglapas. Kaangay bala nga nahadlok sila sa mga contractors kag tag-iya sang mga buildings.
San-o pa bala magkangipon ang atun gobyerno agud magpasabat sa mga nakalapas sang kasuguan? Makuntento na lang sila sa pagkaayo sang kapaltahan nga wala sang nagapanabat? Mapabungol, mapabulagbulag na lang kita pirme?
Sa diin na ang ngipon sang kasuguan? Kamo ang tinugyanan nga magpatuman sini ngaa inyo ginapatumbayaan? (jpranco1975@gmail.com/PN)
