NAGAKATOL ang alipudwan ni Jeck Conlu sang Public Safety and Transportation Management Office ukon PSTMO bangud nga nagadata naman ang presensya sang mga Badjao sa dalanon sang syudad.
Madumduman nga sadtong Setyembre 2018 nagpain sang P225,000 ang city government agud gamiton para sa transportasyon sang mga Badjao gikan sa syudad sang Iloilo pabalik sa ila dutang natawhan sa Mindanao.
Kapin sa 75 ka mga Badjao ang ila gintipon kag gindul-ong sa pantalan agud nga magawaran sang tiket sa barko kag ginpabalunan sang pagkaon agud nga indi paggutumon sa ila nga pagbiyahe pauli sa ila nga lugar.
Apisar sang paghimakas sang PSTMO, liwat na naman nga nagduging ang mga Badjao. Nagapasimpalad ang mga kabataan nga magtakbil sa mga depasahero nga dyip kag nagabitbit sang sobre nga puti kag nagakutib-kutib sang ila pulong nga kon imo hangpon ang ila man lang katuyuan amo nga sila ang hatagan sang kwarta agud nga may makaon.
Lunsay mga bataon pa ang makita sa stoplight sa Taft North, Mandurriao kag posible sa iban pa nga mga lugar nga madamo sang pasahero kag tawo nga nagasaboy sa mga dalan. Lamharon pa ang mga edad apang may mga ginabitbit na nga mga lapsa, ila nga ginasulay sa tagiti sang init kag nagapanglakaton sila nga wala sang hapin ang ila dapa-dapa.
Bangud sa ila presensya, liwat nga natublag ang PSTMO, posible nga bangud man sa yamo sang mga tawo, nagsulat si Conlu sa DSWD-6 agud nga magsugilanon kon ano ang nagakaangay nga pagabuhaton sa mga Badjao.
Sang gin-usisa, natukiban nga mas ginapili sang mga Badjao ang magpadulong sa syudad sang Iloilo bangud nga wala nagapanakit ang mga Ilonggo, maalwan kag masami nga nagahatag sa ila sang kwarta. Maathag nga ini ang rason sang ila pagpabilin diri kag apisar nga ginagastuhan agud nga sila ang makapauli apang padayon sila nga nagabalik diri sa Iloilo.
Mas makatulublag pa gid ang panuaron sang iban nga mga Badjao bangud ang iban nila nga kaliwat nga yara sa Negros Occidental partikular sa syudad sang Bacolod ang nagaplano nga magtabok padulong diri sa syudad sang Iloilo.
Supak sa kasuguan nga sila ang tabugon, supak sa kasuguan nga sila ang sakiton apang mas supak sa kasuguan kon sila ang hatagan sang limos bangud may yara kita sang kasuguan nga nagadumili sa paghatag sang limos.
Dapat dumdumon sang nagahatag sang limos nga may kasuguan kita nga Presidential Decree No. 1563 ukon ang Mendicancy Law of 1978. Maathag sa kasuguan nga ang may penalidad amo ang nagalimos.
Kon padayon naton sila nga saguron sa limos, padayon man sila nga magamuad sa dalan.
Kon indi naton sila pagpaatubangon sa reyalidad, magapabilin sila sa pagpangabuhi sa halusinasyon nga matawhay ang kabuhi kag indi dapat magpangabudlay agud nga malampuwasan ang matag-adlaw nga pagkinahanglan.
Ang paghatag sa ila sang limos amo ang pagtolerar sa ila kahuyang sa paghanghop sa matuod nga kahimtangan sang pagpangabuhi.
Mangin problema naton ang ila saprat nga pagsinarayo. Mangin kabahin kita sa paghurma sang ila panimuot nga magpangabuhi sang pahapos. (bertladera@gmail.com/PN)
