DIRI SA siyudad sang Iloilo, ginapasanyog sang City Agriculture Office (CAO) sa Barangay Lanit, Jaro ang Urban Agriculture, sa idalom sang iya programa nga Kabalikat sa Kabuhayan.
Nagahikayat ining programa, sunu kay City Agriculturist Romulo Pangantihon, sa mga pumuluyo sa pagtanom sang mga ulutanon kag mga kararuton, kag bisan sa pagsagud sang mga hayop agud ibulig itustus sa kinahanglanon nga pagkaon sang panimalay, nga ang iban sini pwede pa madala sa merkado.
Sunu pa gani kay Pangantihon, ang long-term nga plano amo gid ang pagtukud sang Lanit bilang Iloilo City Urban Agriculture Demo Farm and Livelihood Center.
In fact, may mga nahauna na nga 150 ka beneficiario sang programa nga nagpaidalom sa training diri mismo sa Barangay Lanit.
Kalakip sa sining mga trainee ang halin sa Pantawid Pamilyang Pilipino Program (4Ps) sa Ati Community sang Barangay Lanit, mga inmates sang Bureau of Jail Management and Penology (BJMP), mga eskwelahan, mga mangunguma mismo sa nabilin pa nga ulumhan sang siyudad, mga informal settlers sa relocation sites lakip na ang pila ka mga drug surrenderers.
Wala ugaling kita nakapangamusta pa kon ano na ang naabtan sining matahum nga programa, nga makabulig gid sa mga pumuluyo sa ila pangabuhian. Apang galaum kita nga nangin madinalag-on ini nga programa.
In fact, tungod gani seguro sang pagkamadinalag-on sini nga naisipan man ni Konsehal Rudolph Ganzon ang Urban Gardening (Farming) sa iban nga barangay. Kalakip diri ang mga barangay sang Calumpang, Navais, Camalig, Dulonan, Banuyao, kag Tanza Esperanza, pati ang Bo. Obrero National High School bilang una nga batch, ukon grupo.
Gintawag niya ini nga proyekto Food for Everyone for An Agri-Sustainable Tomorrow (FEAST) project.
Importante matuod ining proyekto sa padayon nga pagsaka sang mga balaklon tungod sa dugang nga buhis nga ginpatong sang TRAIN Law kag sa unstable (wala kaseguruhan) nga bili sang mga produktong langis sa international market.
Kabuylog (partner) ni Konsehal Ganzon sa sining proyekto si Gg. Joseph Montelibano, founder kag chief executive officer sang Aloysius Worldwide.
Ginatudluan sining FEAST ang mga pumuluyo agud magtanom sang ila kaugalingon nga pagkaon nga pwede man manegosyuhan.
Agud mapasanyog ining proyekto, plano ni Konsehal Ganzon nga maghiwat sang eco-festival nga naga-showcase sang mga modelo (best) nga mga barangay kag eskwelahan.
Sa una sang tatlo ka bahin (phase), may mga expert sa Urban Farming nga magatudlo sa sining mga barangay, nga nagpabutyag na sang ila interes.
Matahum ini nga proyekto kag ginahandom ta gid ang kadalag-an sini.
***
PASIPLAT
Interesting Facts About West Visayas
By Atty. Rex S. Salvilla +
Pancho Villa
Una nga Filipino World Boxing Champion
(Halin sa Book 7, pahina 12)
Si Pancho Villa (Francisco Gulledo) nangin una nga Filipino World Boxing Champion sadtong 1925. Naghatag ini sang daku nga kadungganan sa Filipinas, labi na gid sa Western Visayas kay tumandok ini siya sang Ilog, Negros Occidental.
Nag-vaquero (cowherd) ini siya sa La Carlota, apang nagbiya sa rantso nga iya ginaubrahan tungod sang malain nga batasan sang iya amo. Naaguman gani niya ang ma-latigo (whipped) sang iya amo. Nagpaamulya siya sa Iloilo kag diri nag-ubra bilang shoeshine boy. Nangin stevedore (kargador) man siya sa Muelle Loney. Naganyat siya sang boxing kag nag-ensayo bilang boksidor sa Iloilo Boxing Stadium.
Pagkatapos sang maduagon nga pag-boksing sa Iloilo, nagsaylo siya sa Manila sa diin ginpanglutos niya ang iya mga kasumpong. Tungod sini, ginpadala siya sa Estados Unidos. Sang 1925, pagkatapos sang pila ka pagdaug, ginkilala na siya bilang World Flyweight Champion pagkatapos lutoson ang British boxer nga si Jimmy Wilde.
Sang sina man nga tuig, ginbalita nga napatay si Pancho Villa tungod sa “blood poisoning” bunga sang isa ka “tooth ailment” pagkatapos lang sang iya away sa ring. Madamo ugaling ang nagapati nga ginpapatay siya sang American Underworld nga nalutos sa ila pusta sa boksing kontra sa iya.
Bilang handumanan sa iya daku nga kadalag-an para sa mga Filipino, masami gani ambahon sang mga Filipino ang “refrain”, ukon koro, nga: “A little chap who put the islands on the map across the seas”. Ginpabantog man niya ang “Pancho Villa pomade”. (w_mateojr@yahoo.com/PN)
