TANAN lang nakibot sang malapnagon nga halit sang COVID-19.
Bisan mga manggaranon nga pungsod nagapangdaang-daang kun ano ang ila himuon agud mapakigbatuan ang paglapta sang virus. Halimbawa na diri ang America nga bisan ano ka abanse ang teknolohiya sa medisina wala sang nahimo sa una nga bugso sang impeksyon sang coonavirus.
Bentaha lang sa ila bangud manggaranon sila mahimo sila makahatag sang bulig sa tanan nga mga pumulyo agud mapahagan-hagan ang epekto sang pandemya sa tagasa ka pamilya.
Diri sa atun sa Pilipinas, nagpadayaw pa kita nga manubo ang atun kaso, apang sang nangin masangkad na ang testing, hinali nagtimbuok ang numero. Ina ang mga nalista lang apang paano ang iban nga wala na nakuhaan sang test bangud napatay na?
Matuod wala sang may nakahanda sa sini nga sitwasyon. Pero halin sang Enero pa ini nga problema sang atun pungsod, apang kulang sa gihapon ang ginahimo nga programa kag lihok sang atun gobyerno. Sa tunga sang pandemya, nabuyagyag pa ang isyu sang korapsyon sa pagbakal sang mga PPE kag iban pa nga gamiton sang mga frontliners.
Mas kakulogmat pa kay sa nabuyagyag nga kontrobersiya, basi maputo na ang PhilHealth bangud sang ginaalegar korapsyon kag indi nagakaangay nga claims sang mga hospital para sa COVID-19 patients.
Kita ang nagpatuman sang pinakamalawig nga lockdown. Pero ngaa nagsumpit pa pataas ang numero?
Paano abi kay ma-lockdown ka, pero wala ka man sang pagkaon nga itunghol sa imo residente. Maubos na sa pa-PR kag paggwapo sa una nga hugnat sang away sa COVID-19 ang pondo. May bilin man pero gin-realign pa.
Kun mag-amo sini ang hulag sang atun gobyerno, wala sang katapusan ang matabu nga latun-laton sang virus. Paano mo punggan ang isa ka amay ukon iloy nga maggwa sa ila balay agud magpangita sang makaon kun may kabataan sya nga nagatangla kag nagawiit ang baba bangud sang gutom?
Tanan na lang ibasol ta sa mga tawo nga iresponsible bangud naggwa sa ila balay bisan may lockdown. Ang pamangkot, bastante bala ang ginahatag sa ila sang gobyerno agud mapanas ang hapdi sang gutom sa ila tyan?
Bisan gani ang ilaga maggwa gid sa buho kun gutom bisan may nagabantay nga kuring sa gwa. Sa simple nga pulong, samtang may ginagutom kag daw lipong ang gobyerno sa ila sitwasyon, ang virus magalatun-laton.
Kun tan-awon natun mas nahadlok pa ang tawo sa multa sa indi pagsoksok sang face mask kag paglapas sang physical distancing kun ipaanggid sa virus nga posible magatapik sa ila. Amo ina nga kun wala gani sang nagabantay, wala man sang facemask, dayun ililiping.
Malikawan ukon mapahagan-hagan ta ang latun-laton kun ang tawo may bastante nga pagakon nga sa isa lang ka kumpas sang gobyerno magatuman sang mando sa gilayon. Ang masakit lang kun wala ka sang makita nga maathag nga hulag sang gobyerno,apang ang pagpamasol ginahaboy lang sa tawo. Ang tawo nga gutom indi maggamitan sang pwersa. Ang tyan nga nagakalam, maningkaras gid agud makakita sang panghapin sa hilab sang tyan./PN
