VP Leni: Kandidato sang mga pumuluyo

MALAPIT na ang eleksyon sang 2022, kag mapuno naman ang aton mga dulunggan sa mga pangako sang mga pulitiko.

Ang pamangkot: Mapatuman bala nila ining mga pangako para sa interes sang mga pumuluyo?

Unfortunately, ang aton experyensya nagasiling nga kalabanan sa ining mga pangako indi gid matuman.

Kag kon matuman man sang pila nga masaligan ang ila pangako, sa masami indi man lubos matigayon tungod sa ini ukon ina nga rason. Pwede man ma-justify ini sang pila ka pumuluyo. Pwede man ugaling nga indi.

On the other hand, may mga pangako man nga indi bagay tagaan sing kabilinggan sang aton matarong nga mga pumuluyo kay indi man matarong ang pagpatuman sini.

Sa English pa, “the end does not justify the means”, nga ginatindugan sang isa ka matarong nga sosyedad katulad sang aton Demokrasya kon diin dapat ipadaug ang “rule of law”, Kahilwayan, kag moral victory sang aton Christian life.

Indi mabaton sang konsyensya, por ejemplo, ang pagpatigayon sang isa ka “good” nga kahimtangan sa sosyedad paagi sa malain (evil) nga pamaagi.

Katulad sang pagpamilit nga mapalinong ang komunidad paagi sa pagpatay sang mga suspetsado nga indi man lang mabatian ang ila bahin.

Labi na gid nga indi ini matarong kon magwa nga inosente pa gani ini kon mapaatubang sa “fair trial”.

Kon may grupo nga amo sina ang pamatasan, abaw indi gid kamo magboto sa ila! Mahadlok man kamo sa Diyos sa pagboto sa sining klase nga mga tawo! Makasala pa kamo sa Diyos by complicity.

***

Indi na kandidato si VP Leni Robredo sang Liberal Party para Presidente sa iya desisyon nga magdalagan na gid lang nga wala sing Partido kag bilang isa na lang ka kandidato Independiente.

In effect, bukas na siya sa pagpili sang tanan nga mga pumuluyo regardless kon ano man nga Partido ang huyog nila.  

In fact, indi oso sa mga Filipino ang block voting, ukon ang magboto straight halin sa linyada sang Partido.

Personality oriented sila sa ila pagboto, kag bisan may huyog sila nga palabihon ang isa ka Partido agud suportahan, may pila gid dira nga luyag nila nga mas “nahagugmaan” nga botohon.

In other words, GUGMA ang ila daku nga talaksan sang ila boto upod ang KAISUG agud pangapinan ang ila interes.

Bilang Independiente nga kandidato, ginabuksan ni VP Leni ang kahigayunan nga matun-an siya “higugmaon” sang mga pumuluyo over and above sa kon ano man nga konsiderasyon pang-partido, kag, sa iya bahin, patungdan sing may kaisug ang katumanan sang kaayuhan sang tanan.

Bukas man siya sa mga may luyag makig-guest candidate upod sa iya kay may daku siya nga ganhaan sa ila tungod gani wala siya sing Partido.

Bukas man siya sa luyag magbulig nga mga grupo, lakip na ang sadto ginapangunahan nga Liberal Party. Nagpahayag na gani ini sing full support sa iya.

Masaligan man niya ang bulig pinansyal kag simpatiya sang nagapati sa iya kilala na nga panindugan social, moral, kag pang-ekonomiya.   

Kay wala man siya sing Partido, pwede siya magtutok na lang sa mga isyu nga importante sa mga pumuluyo – katulad sang pagkauhaw nila sa Demokrasya kag Kahilwayan nga gindaug naton batok sa martial law regime ni Marcos kag natun-an nga pagkangil-ad sa “culture of impunity”, ukon wala kasuguan nga pagginahum sang karon nga liderato;

Ang isyu man sang indi patas nga pagtratar sa kinamatarong sang tawo, katulad sang pagpapatay  nga wala “due process” sang mga imol nga mga suspetsado sa illegal drugs samtang indi matandug, kag ginapangapinan pa, ang mga abyan kag kapamilya nga corrupt, kawatan kag druglord;

Ang nagalala nga pinatyanay kon diin nagsaka ang “murder cases” sang  60% nga laban sini tungod sa riding-in-tandem nga mga vigilantes kag sang ginapatihan nga “Duterte death squad”;

Pagpanglagas kag pagtum-ok paagi sa binutig kag harassment batok sa oposisyon agud dugmukon, samtang dapat tahaon ini tungod importante ini sa kadalag-an sang aton Demokrasya. Etcetera!

***

Kon maisyu man ang problema sang pag-kampanya sang Independiente nga kandidato, indi ini problem kay VP Leni. Kilala na siya kag yara man ang madamo nga outlet, nga madamo sini libre, katulad sang social media kag VP Leni for Presidente nga mga grupo sa nagakalain-lain nga bahin sang pungsod. Indi bala?/PN