NAHISUGTAN sang United Nations ang “peaceful co-existence” sa tunga sang mga nasyon regardless kon ano man ang ideolohiya (ideology) ukon klase sang pagpalakat sang pangabuhi sang kada isa.
Kon may problema sa ila kaugalingon nga pungsod, gina-respeto man nga maresolbar nila ini nga indi pag-entrahan sang iban, kag kon may conflicto man ang duha ukon pila ka pungsod nga mapatung-an ini sang United Nations.
Tungod sini wala naman sing dapat mangin problema sa ila relaciones, samtang gapabilin ang kinamatarong sang kada isa sa ila national interest para sa bagay nga pag-regulate sang ila pagpakig-relasyon.
Sa negosyo man, cultural kag educational exchange, mutual defense, kag iban pa.
Gani, sa pamangkot kon ano ang tindug naton sa donasyon (libre nga bulig), sang pila ka doses sang Sinovac vaccine sang China sa aton, wala man diri dapat may problema. Kabahin lang ina sang pagbinuligay sang mga myembro sang United Nations, kon diin ang Filipinas kag China mga myembro.
Makatugda kita ugaling sa pagpasalamat ni Presidente Duterte sa gin-donar sang China nga Sinovac vaccine.
Ginakulbaan kita sa sining pagpasalamat ni Presidente nga kinahanglan pa niya magbisita kay Chinese President Xi Jinping agud personal nga magpasalamat diri.
Basi bala sa ining ila pagkit-anay may upod na ini sing dugang pa nga pabor sa China nga mas makaupang sa aton pagpasanyog sang aton soberanya sa West Philippine Sea. Nagaluntad diri ang aton 200-nautical mile nga Exclusive Economic Zone nga ginpat-ud na sang Hague Tribunal sa pagdaug naton sang aton kaso batok sa China sadtong 2016.
Lain ang pagpasalmat sa sugilanon lang, lain man kon personal na ang paghatag sing amistades, kon diin ang kahirup sa personal nga pagkit-anay pwede makapasanyog sang pagbayluhanay sing interes nga labi pa makaupang sang aton interes sa West Philippine Sea.
Nga daan sadto pa ginpasugtan ni Presidente Duterte ang China nga mangisda sa sulod sang aton EEZ. Wala man sini napunggan ang pagpangagaw sang China sang pila ka isla sa sulod sang aton EEZ. Wala man nahimo ang gobyerno ni Presidente Duterte agud matapna ang ilegal kag makahalalit nga pagpanguha nila sang mga endangered species sa aton kadagatan. Etcetera, etcetera!
Pero, ngaa bala sobra gid ka-importante sa aton ang donasyon sang China sang pila ka doses sang Sinovac vaccine?
Napilitan lang kita sa pagbaton sining Sinovac vaccine tungod wala gid kita makuha sing vaccine sa global market kay ginauna sang iban nga mga pungsod ang ila mga pumuluyo kag kulang pa gani ang ma-producir nila sini para sa ila mga pumuluyo.
Una naka-producir ang China sang vaccine kay sa China mismo nagsugod ang COVID-19. Natural lang nga mauna man ini sa paghatag sang vaccine sa iya pumuluyo, nga ang sobra pwede na ini ma-donar ukon manegosyohan sa gwa.
Tungod sini wala na kita nagpamalibad pa sa pagbaton sining Sinovac vaccine bisan manubo ang “efficacy” (50 porsyento lang) sini ikumparar sa vaccine sang iban nga pungsod, kon diin ang “efficacy” nagalab-ut gani sa 95 porsyento.
Sunu sa mga siyentipiko ugaling, ang Sinovac, bisan sa manubo sini nga “efficacy”, makabulig na sa paglikaw sang aton mga pumuluyo sa makamamatay sini nga igu, nga kon maigu gid man sang COVID-19 ang pasyente “mild”lang.
Pero, dapat bala kita maghatag gid sing daku nga pagpasalamat kag kabalaslan sa China tungod sining pag-donate sini sang Sinovac vaccine?
Sa matuod lang, bisan katiting wala kita sing kabalaslan sa China tungod sa gin-donar sini nga vaccine, luas lang sa pagpasalamat, bisan pakulahaw lang, sa sining “strange gesture” sang China sa pagpakita nga luyag sini makig-abyan gihapon samtang sige man ang pag-“bully” sini sa aton.
Ang tuod-tuod nga kabalaslan ginahatag ina sa may bunayag (pure) nga tuyu sa pagbulig. Indi kay sa kon sin-o nga may malimbungon nga tinutuyu sa aton soberanya sa West Philippine Sea.
Sa ginhimu sang China sa West Philippine Sea, wala kita matuod kilalahon nga kabalaslan sa China. Kulang pa gani ibayad ang gin-donar sini nga mga vaccine sa sige pagtampalas sini sa aton soberanya sa West Philippine Sea.
Dapat may utang pa gani ini nga balayran sa Filipinas tungod sa sining padayon nga “bullying” kag panghalit sa aton sa sulod mismo sang aton EEZ sa West Philippine Sea. Indi bala?/PN
