DINAG-ON na ang nakalipas apang wala sa gihapon sang solusyon ang pagbaha sa syudad sang Iloilo.
Pila na ka tagdumala ang naglabay ang problema nagapabilin kag padayon nga nagahatag sang huol sa mga pumuluyo ilabi na sa bahin sang Iloilo Terminal Market.
Ginaagwanta sang nagapangabuhi sa sina nga mga lugar ang ila kahimtangan kag padayon nga nagalaum nga mahatagan sang solusyon sang city government kag national government paagi sa Department of Public Works and Highways (DPWH).
Gin-atipan, ginlimpyuhan ang mga kanal, apang sa paglipas sang panahon ang problema nagapadayon bangud sa tagsa ka mag-ulan ang dalan ginalapawan sang tubig kag mas nagadalom bangud sa mas mamunog nga pagtupa sang ulan.
Nagpain ang DPWH sang P100 million nga balor sang comprehensive drainage project para sa syudad sang Iloilo nga makita karon sa junction sang General Luna – Jalandoni streets tubtub sa Barangay Rizal Palapala kag ang tubig magabuslog sa baybay.
Gin-aprubahan sang Sangguniang Panlungsod ang ordinansa nga temporaryo nga nagapasado sa intersection sang dalan General Luna kag dalan Jalandoni sa sulod sang isa ka bulan umpisa Abril 26 tubtub Mayo 26, 2017 kag ang duha ka linya sang dalan Jalandoni sa kilid sang University of San Agustin gikan sa corner sang dalan Delgado tubtub sa corner sang dalan General Luna tubtub sadtong katapusan sang Hulyo 2017.
Umpisa nga ginsuguran ang proyekto, tubtub karon wala sa gihapon matapos kag nagmitsa pa sang palaligban sa DPWH bangud nga nagadis-ayri pa ang kontraktor kag nagaprangka sang iya kapaslaw sa paghuman sang proyekto.
Madamo pa sang mga magagmay nga drainage nga ginpang-obra ang iban naghatag sang solusyon, ang iban ang wala sang solusyon.
Lantawa ang ginkay-o nga dalan sa Luna, La Paz nga gin-una human ang drainage apang sang nagmunog ang ulan sang Lunes, liwat nga nagtuhaw ang problema nga kaangay lang nga wala sang may ginkay-o kag ginpatuman nga proyekto ang DPWH.
Maathag nga indi na matupungan ang ka inutil sang DPWH ilabi na sa syudad sang Iloilo sa pagatuman sang proyekto nga epektibo kag mapuslanon. May nagahulat na nga sabat kag balibad ang Iloilo City District Engineering Office sa tion nga may magyamo ukon magreklamo nga mga tawo.
Luyag sang DPWH nga patihan kag pamatian lang sila sa ila rason kag balibad samtang ang pumuluyo ang padayon nga nagaagwanta sa paglusong sa tubig-baha. Pilit nila nga ginapakalmante ang balatyagon sang mga tawo nga natugnawan na ang mga dapa-dapa kag ginakurog nga mgaa batiis.
Matuod gid man nga kon padayon ang problema sang pagbaha, padayon man ang pagpangita sang solusyon kag sang pondo agud nga matigayon ang ginaduso nga mga proyekto.
Ginatun-an man kuno nila ang tanan apang ngaa wala sang kaayuhan nga naaguman ang mga tawo gikan sa ila mga proyekto.
Madasig lang sila sa pagbungkal apang uyaya sa paghuman sa dalan. Pirme lang may drainage plan apang ang baha indi masolusyunan.
Kunsabagay, indi dapat nga hatagan sang lubos nga slousyon ang pagbaha agud nga indi man maghubas ang dalagku nga pondo kag mga proyekto./PN
