ANG magkaalyansa dapat ulolopod sa tanan nga away. Sa politika man ukon para sa kaayuhan sang ginapangalagaran nga banwa.
Apang diri sa syudad sang Iloilo, indi lang ang mga katapo sang konseho ang indi mo makita nga kaupod ni Mayor Jerry Treñas sa away kontra COVID-19. Huo, tanan nga ginapangayo nga legislative action ni Treñas, ginaaktohan sang positibo sang konseho sa pagpamuno ni Vice Mayor Jeffrey Ganzon. Pero diin sila sa ti-on sang pagpatuman sini? Indi sila kitaon.
Pero ang isa sa pinakaathag amo ang mga magkatuhay nga hulag ni Treñas kag sang kaalyado nga si Cong. Jam-jam Baronda. Nga-a magkatuhay ang ila hulag?
Katapusan lang nga nadumduman ko amo ang pag-donate sang opisina ni Baronda sang bugas, alcohol kag iban pa sa syudad. Pagkatapos sadto, nga-a daw nag-aslum na ang ila pagtamdanay ni Treñas?
Nga-a nagahulag sang separado si Baronda agud makapauli ang mga seafarers kag overseas Filipino workers (OFWs) nga wala sang koordinasyon kuno kay Treñas?
Madumduman nyo pa bala nga masingki ang mga tinaga nga iya ginhaboy sa kongresista kay kuno wala sang koordinasyon sa iya?
Subong padayun ang pag-abot sang mga stranded natun nga mga kauturan sa pagpatigayun ni Baronda. Sa koordinasyon sa Inter-Agency Task Force (IATF) nangin kalmado na ang mga lokal officials kag nagpasalig sang ila kahandaan nga magbaton sang mga magapauli nga locally stranded individuals (LSI) kag repatriated OFWs.
Sadtong Meyerkoles, nakigsapol si Treñas sa mga lider sang nagkalainlain nga local government units (LGUs) sa Rehiyon 6. May Zoom meeting sila kaupod sa mga ekonomista kag kay Ilonggo senator Franklin Drilon.
Pero nga-a wala si Baronda? Nga-a wala sya gin-upod sa mga plano kun paano buhion ang ekonomiya sang rehiyon kun ang iban nga opisyal ara man sa meeting?
Ahhh, base may session si Jam-jam, siling pa sang iban.
Sa sini nga mga sitwasyon matingala man kita nga-a wala sila nagaupod sa away sang syudad kontra COVID-19? Nga-a may tagsa-tagsa sila ka tikang?
Malayo pa man ang 2022 nga daw nagalinyahanay na?
Pero para sa ihibalo sang tanan, bisan indi man kaupod ni Treñas, padayun ang paghatag sang bulig ni Baronda. May mga financial assistance sya nga ginhatag sa mga pigado nga sektor. Padayun man ang iya paghatag sang bulig sa mga sumalakdag sa barangay kag mga lider niya. Maathag nga ginahandaan man sang kongresista ang posible pagsipakanay nila sang banas sang iya kaalyado.
Indi ini intriga, ha. Ini obserbasyon lang samtang ara kita sa gyera kontra COVID-19./PN
