SILING ni suspended congressman Jerry Treñas, mga kapitanes ang nagduso sa iya nga magpadalagan bilang alkalde sang syudad sang Iloilo. Paathag niya nga indi sya ang gusto nga magpadalagan kundi ang mga kapitan.
Fast forward…Nagguwa ang manifesto sang nagpakilala nga Molo ABC (Association of Barangay Councils) nga ginahingyo nila si Mayor Jose Espinosa III nga magpadalagan bilang kongresista agud indi magguba ang ila pag-updanay ni Treñas.
May mga ti-on nga nagapang-agda si Espinosa sang kape kape sa mga barangay officials apang indi sila magtambong. Ay nano? Nagapapresyo? Nagapakita sang pagkapoderoso?
Kaangay nga ang kapalaran sang politiko sa syudad nasandig sa kamot sang mga kapitan. Ngaa ano gid ang impluwensya ni kapitan sa iya mga pumuluyo? Mapadaug bala sang kapitan ang isa ka politiko?
Ngaa nagapapel gid subong ang mga kapitan? Kaangay bala nga pati ang amay sang syudad daw gina-hostage nila? Sin-o sila nga magdikta sa isa ka amay sang syudad?
Subong nga panahon maayo man ina kay empowered ang mga opisyal sang barangay. Ugaling ang problema kay maantas man sa pamolitika ang mga kapitan. Maisog pa gani nga indi mapasulod sa ila barangay sa ti-on sang kampanya kun kontra partido.
Ngaa nangin poderoso ang mga kapitan?
Nagsugod ini sang panahon nga ginapalamon sila sang kwarta sang isa ka politiko. Kada meeting sa ila may binolto nga kwarta sa lamesa nga ginapanagtag antes sila magpauli. Asta nga ginpanubli ini sang nagsunod nga mga politiko lakip na sang karon nga panahon.
Bati-an mo pa gani ang kumod sang mga kapitan nga bagit ang politiko kun lima ka gatos lang ang ihatag sa ila kada meeting. Ay aba, high-maintenance man gale ini mga kapitan. Kada meeting may pabalon gid?
Sa matuod lang ining mga barangay officials indi na magsuporta sa politiko bangud sa ikasangkol. Ang suporta sining mga kapitan nasanto sa kun pila ang ginapakumkom sa ila kada tapos sang meeting kag kun pila ang pabangal sa ila kun lapit na gid ang election.
Mga Ilonggo, magmangin mabinatayon kamo kay subong pa lang ginabaligya na kamo sang inyo kapitan sa politiko. Kamo ang iya ginataya sa politiko agud makakwarta. Maathag nga pasalig nila padag-on ang isa ka politiko sa ila barangay kabaylo sang kwarta.
Ti masugot lang kamo nga ibaligyo kamo sang inyo kapitan sa politiko?
Kada uli ni kapitan sa inyo barangay halin sa meeting kay cong…pangayui nyo sang inugbakal sud-an kay sigurado may pakumkom na si Mr. Congressman sa ila.
Tandaan nyo isa lang ang boto ni kapitan kag indi ina makapadaug sa politiko. Ang inyo nga boto sa barangay ang ila ginakapital sa politiko agud makakwarta!
Abi mga kasimanwa, magmata na kita! (jpranco1975@gmail.com/PN)
